Xədicə İsmayılova Anna Politkovskaya adına mükafata layiq görülüb

Həbsdə saxlanılan jurnalist Xədicə İsmayılova İsveçin Milli Mətbuat Klubu tərəfindən təsis edilmiş Anna Politkovskaya adına “Söz azadlığı” mükafatına layiq görülüb.

Bu mükafat araşdırmaçı jurnalistikaya və cəsarətə görə təqdim edilir. “Xədicə İsmayılova Azərbaycanda ən yüksək səviyyədə korrupsiyanın ifşası üçün böyük cəsarət nümayiş etdirib. O, həqiqəti üzə çıxarmaq üçün özünü böyük riskə məruz qoyub. Buraya hakim ailənin “Telia Sonera” şirkəti ilə biznes-əlaqələrinin araşdırılması da aiddir.

İsmayılovanın həbsi mətbuat azadlığının pozuntusu və jurnalistləri hakim rejimin sui-istifadələrini üzə çıxarmaqdan çəkindirmək üçün bədnam addımdır”, deyə İsveçin Milli Mətbuat Klubunun prezidenti Byern Hager (Björn Häger) bildirib.

* “Azadlıq” radiosunun icmalçısı Xədicə İsmayılova saxta özünü öldürmə həddinə çatdırma ittihamı ilə həbs edilib, amma sonradan ona qarşı vergi ödənişindən yayınma, mənimsəmə, səlahiyyətlərini aşma ittihamları irəli sürülüb. İsmayılova bütün ittihamları təkzib edir və təqibinin əsl səbəbinin Azərbaycan hökumətinin yüksək eşelonlarında korrupsiyanı ifşa etməsi olduğunu hesab edir. -06В-