Xədicə İsmayılova: Məni Azərbaycan hakimiyyətinin sifarişi ilə təqib edirlər (YENİLƏNİB-VİDEO-4)

Bu gün Bakı Ağır Cinayətlər Məhkəməsində Ramella Allahverdiyevanın sədrliyi ilə jurnalist Xədicə İsmayılovanın işi üzrə hazırlıq iclası keçirilib.

Zala daxil olmağa müvəffəq olan jurnalistin azsaylı həmkarları onu alqışlarla qarşılayıblar. Bu zaman iclasın keçirilməsi üçün yüksək təhlükəsizlik tədbirləri görülüb. Zalda 20 nəzarətci və cəmi 28 müşahidəçi iştirak edirdi.

İsmayılova şüşə qəfəsə - “akvariuma” salınıb.

Prosesin əvvəlində o bildirib ki, İstintaq Təcridxanasının rəhbərliyi onun yazışmalarını gecikdirir. Belə ki, Ali Məhkəmədən iyunun 22-də göndərilmiş məktubu o, 13 iyulunda ala bilib.

“Məni getdikcə daha çox təcrid edirlər. Özümü Kəmaləddin Heydərov, İlham Əliyev kimi hiss edirəm. İstintaq Təcridxanasında məni aparanda bütün dəhlizləri boşaldırlar...”, deyə İsmayılova bildirib.

Daha sonra o, məhkəmənin uydurma səbəblərlə müdafiədən uzaqlaşdırdığı Yalçın İmanovun onun vəkili kimi bərpa edilməsi haqqında vəsatət qaldırıb.

Hakim Xədicədən məhkəmə heyətinə etirazı olub-olmadığı barədə soruşduqda Xədicə belə cavab verib: “Mən sizi Əvəz Zeynallının prosesindən tanıyıram. Bilirəm ki, sifarişli hökm çıxaracaqsınız. Amma burada bütün hakimlər sizin kimidir, ona görə də fərqi yoxdur”.

Vəkil Fariz Namazlı da Yalçın İmanovun müdafiəçi kimi bərpası haqqında vəsatət qaldırıb. Amma vəsatət təmin edilməyib.

Daha sonra Namazlı bildirib ki, Xədicə ittiham edildiyi cinayətlərin subyekti deyil – o, radio işçiləri ilə müqavilə bağlamayıb. Heç bir maddi məsuliyyət daşımayıb.

Namazlı həmçinin bildirib ki, “Azadlıq” radiosunun lisenziyasının olmaması barədə ittihamın İsmayılova ilə heç bir əlaqəsi yoxdur.

Xədicə radioda vəzifəli şəxs deyildi, yalnız Bakı Bürosunun yaradıcılıq fəaliyyətinin əlaqələndiricisi idi.

O, əmlaka və maliyyə resurslarına, işçilərin vergi ödəməsinə görə cavabdeh deyildi. “Xədicə ağır nəticələrə səbəb olacaq qərarlar qəbul edə bilməzdi, ona görə ki, ona əmlak etibar edilməmişdi”, deyə vəkil bildirib.

Vəkil həmçinin Tural Mustafayevin təzyiq altında Xədicəyə böhtan atdığı barədə etirafına diqqət çəkib. Amma istintaq ona kimin təzyiq göstərdiyini araşdırmayıb.

Vəkil Fəxrəddin Mehdiyev Xədicə İsmayılovanın əməllərində qanunsuz sahibkarlığın olmamasına diqqət çəkib. Çünki o, kommersiya fəaliyyəti ilə məşğul olmayıb.

İsmayılova həmçinin vəzifə səlahiyyətlərindən sui-istifadə edə bilməzdi, belə ki, yaradıcı fəaliyyətlə məşğul idi və maliyyə vəsaitlərini idarə etmirdi.

İsmayılova özü qeyd edib ki, onun bank sənədlərini imzalamaq səlahiyyəti yox idi və o, vergilərə görə cavabdeh deyildi.

“Mənimsəmə və israf etibar edilmiş əmlak barəsində törədilə bilər, mənim isə belə bir əmlakım yox idi, mən yaradıcılıq məsələlərinin planlaşdırılması ilə məşğul idim”, deyə İsmayılova bildirib.

Tural Mustafayevin özünüöldürmə həddinə çatdırılması haqqında ittihama toxunan İsmayılova deyib:

“Bu barədə danışmaq istəmirəm. İnsanların zəifliklərindən istifadə etmək mənim işim deyil, sizin işinizdir. Bizim işimiz zəifləri qorumaqdır”, deyə İsmayılova bildirib.

O qeyd edib ki, cinayət işi ilə tanış ola bilməyib, belə ki, ona materiallarda qeydlər aparmağa icazə verməyiblər. Ona materiallarını surətini verməyi vəd ediblər, amma hələ də verməyiblər.

Hakim bildiriblər ki, proses zamanı surətlər İsmayılovaya təqdim ediləcək.

Müdafiə tərəfi həmçinin bəzi şahidlərin çıxarılması haqqında vəsatət qaldırıb, amma bu vəsatət, eləcə də məhkəmənin videoçəkilişinin aparılması haqqında vəsatət təmin edilməyib.

Hakim Mustafayevin İsmayılovaya qarşı şikayətindən imtina etdiyi videomüsahibəsini də qəbul etməyib.

Xədicə də məhkəmənin videoçəkilişinin aparılmasında israr edib. “Şəxsi həyatımdan kadrlar gizlicə çəkilibsə, məhkəməni niyə çəkmək olmaz?”

İsmayılova bildirib ki, onu İlham Əliyevin və onun ailə üzvlərinin biznesinin araşdırılmasına son qoymağa məcbur etmək üçün həbs ediblər. “Amma indi bunu həmkarlarım edir”, deyən jurnalist əlavə edib ki, istintaq və İstintaq Təcridxanası rəhbərliyi ondan mətbuatda material dərc etməməyi tələb edir, İlham Əliyevin isə ona qarşı şəxsi ədavəti var.

Prokuror onun sözünü kəsməyə çalışıb, amma İsmayılova qeyd edib ki, İlham Əliyevin adı prokurorun inhisarında deyil.

Onun vəkillərin yanına oturdulması çağırışına cavabda prokuror deyib: “O, mühafizə altında belə məhkəməyə təzyiq göstərir. Onu buraxmaq olmaz”. Daha sonra o bildirib ki, həbsdə saxlanılması jurnalistin təhlükəsizliyi ilə əlaqədardır.

İclasın fasiləsində İsmayılova danışıb ki, Kürdəxanı İstintaq Təcridxanasında Leyla Yunusa işgəncə edən Nuriyyə Hüseynova bütün məhbuslara bunu necə etdiyini danışır. Hüseynova etiraf edir ki, rəhbərliyin tapşırığını yerinə yetirir və o, bütün işləri yoluna qoya bilər.

Fasilədən sonra hakim cinayət icraatına xitam verilməsi, qətimkan tədbirinin dəyişdirilməsi, jurnalistin vəkillərinin yanında oturmasına icazə verilməsi və s. haqqında vəsatətləri təmin etməyib.

Mahiyyəti üzrə dinləmələr 7 avqust saat 11.00-a təyin edilib. -06D-

2015 İyul 24 (Cümə) 11:48:23

Gücləndirilmiş təhlükəsizlik tədbirləri, polis dəstələri və məhkəmə zalına məhdudlaşdırılmış giriş. Hakimiyyət Ağır Cinayətlər Məhkəməsində jurnalist Xədicə İsmayılovanın işi üzrə prosesi belə keçirir.

İyulun 24-də jurnalistlər, ictimai və siyasi xadimlər, habelə xarici diplomatlar da daxil olmaqla, onlarla insan hakim Ramella Allagverdiyevanın sədrliyi ilə başlamış hazırlıq prosesində iştirak üçün zala buraxılmayıb.

Polis və məhkəmə nəzarətçiləri boş yerlər olmasına baxmayaraq, insanları zala buraxmayıblar. Bu da toplaşanların etirazlarına səbəb olub və onlar dəhlizdə əl çalıb "Xədicə" deyə qışqırmağa başlayıblar, xəbəri hadisə yerindən Turan-ın müxbiri verib.

Eyni zamanda polis küçəni mühasirəyə alıb və toplaşanları zalın pəncərələrinə yaxınlaşdırmağa. -06В-