Yarım milyard dollara toyxana?

Sən demə, Bakının yeni olimpiya stadionunda toy keçirmək olar. Dövlət büdcəsinə yarım milyard dollara başa gələn və böyük beynəlxalq yarışlar üçün nəzərdə tutulan tikili, sən demə, toy və ad günləri keçirilməsi üçün nəzərdə tutulub.

Stadionun saytında yer alan reklamda deyilir (üslub və orfoqrafiya olduğu kimi saxlanılmışdır): “Bakı Olimpiya Stadionunda toy etməklə siz bu mühüm hadisəyə yaradıcı yanaşma etmiş olacaqsınız. Ərazinin əzəməti peşəkarlara burada unudulmaz və original mühit qurmağa kömək edəcək. Siz burada kiçik banketlərdən böyük toy mərasimlərinə qədər tədbirlər keçirə bilərsiniz. Dəbdəbəli interyer, unikal atmosfer, yüksək səviyyəli tədbirlərin təcrübəsi sizə unudulmaz və əvəzolunmaz mərasim yaşadacaq”.

Xatırladaq ki, 2015-ci il Avropa Oyunlarına qədər istismara verilmiş Olimpiya Stadionuna 65 min tamaşaçı yerləşir. Avropa Oyunları başa çatdıqdan sonra burada cəmi bir futbol maçı keçirilib.

Bu yeni idman tikilisinin istismarının neçəyə başa gəldiyi məlum deyil. Lakin aydındır ki, stadion boş qalır və onu toylar və korporativlər vasitəsilə səmərəli etmək qeyri-mümkündür.

Bu da böyük dövlət vəsaitinin düşüncəsiz və bacarıqsız sərf edilməsinin daha bir nümunəsidir. -02/16В-