«Donuz Qripi» varmı, yoxmu?

Azərbaycanla qonşu dövlətlərdə - Türkiyə, Rusiya, İran və Gürcüstanda donuz qripinə tututlanların sayında hər gün artım var. Hava-damcı yolu ilə yayılan xəstəlik bütün ölkələri təcili adımlar atmağa vadar edib. Azərbaycanın dövlət strukturları isə bu günədək ölkədə günə bir nəfərin belə, bu virusa yoluxmadığını bildirir. Hər dəfə açıqlanan statistik məlumatlarda insnalarda “donuz qripi”nin aşkarlanmadığı, yalnız kəskin resperator infeksiyaların üzə çıxdığı və onların müalicə uyğun müalicə aldıqları vurğulanır.

Professor Adil Qeybulla “Modern.az”-a açıqlamasında bildirib ki, statistik rəqəmlər ölkəmizdə “donuz qripi”nə yoluxanların olmadığını göstərsə də, bu bir qədər məntiqə sığmır. Onun sözlərinə görə, “çox ağır qrip əlamələtləri, yüksək temperaturla ağır şəraitdə müalicə olunan və dünyasını dəyişən insanlar da olur. Ola bilsin ki, bunların içərəsində “donuz qripi” olub. Hər halda virus idenfikasiya olunmadan birmənalı rəy irəli sürə bilmirik, bu imkan rəsmi orqanların əlindədir”.

O bildirib ki, dövlət vaxtında  Dünya Səhiyyə Təşkilatının müvafiq strukturlarına müraciət etməli,  qan nümunələrini xaricdəki laboratoriyalarda yoxlatmalıdır. “Bizdə bu qrip yoxdur və olmayacaq” kimi bəyanat vermək yox, məsələyə daha ciddi yanaşmaq lazımdır. Hesab edirəm ki, “donuz qripi” aşkarlansa belə, onun gizlədilməsi mümkündür. Çünki Azərbaycan miqrasiya durumundadır. 3 milyon azərbaycanlı ölkə xaricindədir. Gediş-gəliş nəticəsində ölkəyə daxil olan yoluxmuş şəxslər özləri ilə virusu gətirə bilərlər.

Respublika Taun Əleyhinə Stansiyanın Xüsusi təhlükəli yoluxucu xəstəliklərin epidemiologiyası şöbəsinin müdiri, tibb elmləri namizədi Rita İsmayılova isə Turan-a bildirib ki, yanvar ayından bu günə qədər stansiyaya kəskin resperator simptomlu xəstələrdən 360 nümunə daxil olub. Nümunələr hamısı “donuz qripi”nə görə də müayinə olunub və nəticələr mənfidir.

R.İsmayılova Azərbaycanda qonşu ölkələrlə müqayisədə “donuz qripi”nə yoluxmaların olmamasını  “bizdə qabaqlayıcı tədbirlər daha tez başlaması, xaricdən gələn maşınların dezinfeskiyası edilməsi” ilə izah edib.

DST isə xəbərdarlıq edir ki, əhalinin bəzi qrupları – yaşı 65-dən çox olanlar, qocalar və əlillər üçün olan stasionar müəssisələrdə yaşayanlar, hamilə qadınlar, xroniki xəstələr, o cümlədən ürək, nevroloji xəstəlikdən əziyyət çəkənlər, 6 ay-6 yaş arasında  uşaqlarda “donuz qripi” xəstəliyinin ağır formada inkişaf etməsi ilə bağlı böyük risk var.Buna görə də  təşkilat  bu qrupun  hər il qripə qarşı vaksin edilməsini tövsiyə edir.

DST –nin başqa bir tövsiyəsi isə bir başa əhaliyə yönəlib. Özündə dərin öskürək ya qeyri-adi qrip əlamətlərini müşahidə edən insanlar təcili həkimə müraciət etməlidir. “Öskürək, asqırma, boğazda ağrı, başağrısı və azca yüksəlmiş temperatur kimi əlamətləri özündə hiss edən insanlar evdə qala və  ambulator müalicə ala bilərlər. Amma bu əlamətlərin özünü göstərdiyi andan başlayaraq, 72 saat ərzində vəziyyəti yaxşılaşmayanlar, xəstəliyi inkişaf edənlər mütləq həkim-terapevtlə məsləhətləşməli və antivirus preparatları müalicəyə başlamalıdır.

Səhiyyə Nazirliyi Respublika Gigiyena və Epidemiologiya Mərkəzinin şöbə müdiri Ziyəddin Kazımov  “Donuz qripi” ilə bağlır Bakı, Sumqayıt, Gəncə, Mingəçevir şəhərləri və Abşeron rayonundakı məktəb və bağçalarda dezinfeksiya işlərinin aparıldığını deyib.

Nazirliyin mətbuat xidmətinin rəhbəri Liya Bayramova isə “Turanın” əməkdaşına bildirib ki,  “Azərbaycanda indiyədək qriplə əlaqədar götürülən heç bir nümunədə H1N1 virusu aşkarlanmayıb, hazırda ölkədə “donuz qripi” ilə bağlı heç bir təhlükə yoxdur. Hər gün monitorinqlər aparılır və vəziyyətə nəzarət edilir. İndi qədər heç bir yoluxma faktı qeyə alınmayıb”.