Səhhətində ciddi problemlər olmasına baxmayaraq, məhkəmə jurnalisti həbsdə saxlayır

Fevralın 6-da Bakının Xətai Rayon Məhkəməsi jurnalist Şahnaz Bəylərqızı barəsində 3 ay 15 gün həbs qətimkan tədbiri seçib.

Vəkil Bəxtiyar Hacıyevin Turan-a verdiyi məlumata görə, jurnalistə qarşı Toplum TV-nin işi üzrə daha əvvəl həbs edilmiş jurnalistlərə və fəallara qarşı irəli sürülən ittihamlar irəli sürülüb. Buna baxmayaraq, Bəylərqızı ayrıca icraata ayrılmış iş üzrə məsuliyyətə cəlb edilib.

Xatırladaq ki, ibtidai istintaqın yekunlarına görə Toplum TV-nin işinin fiqurantlarına qarşı Azərbaycan CM-in aşağıdakı maddələri ilə ittihamlar irəli sürülüb:  

162-1 (Əmək müqaviləsi (kontraktı) hüquqi qüvvəyə minmədən işçilərin hər hansı işlərin (xidmətlərin) yerinə yetirilməsinə cəlb edilməsi);  

192.3.2 (Qanunsuz sahibkarlıq, xüsusilə külli miqdarda gəlir əldə etməklə törədildikdə);  

193-1.3.1 (Cinayət yolu ilə əldə edilmiş əmlakı leqallaşdırma, mütəşəkkil dəstə və ya cinayətkar birlik (cinayətkar təşkilat) tərəfindən törədildikdə);  

193-1.3.2 (eyni əməllər, xeyli miqdarda törədildikdə); 

206.4 (Qaçaqmalçılıq, mütəşəkkil dəstə tərəfindən törədildikdə);

213.2.1 (Vergiləri, işsizlikdən sığorta, icbari tibbi sığorta və ya məcburi dövlət sosial sığorta haqlarını ödəməkdən yayınma, mütəşəkkil dəstə tərəfindən törədildikdə). 

Jurnalisti 12 ilədək azadlıqdan məhrumetmə cəzası gözləyir.

Jurnalist ittihamları rədd edir.

Məhkəmə iclasından əvvəl vəkil Xətai Rayon Polis İdarəsinin Müvəqqəti Saxlama Təcridxanasında Bəylərqızı ilə görüşüb.

"Şahnaz Bəylərqızının səhhəti yaxşı deyil. Onun diabeti və yüksək qan şəkəri, yüksək qan təzyiqi var. İstintaq tədbiri zamanı onun təzyiqi anidən 200-ə qalxıb, "təcili yardım" çağırılıb. 

İndi onun qan təzyiqi 140-150-dən aşağı düşmür", deyə vəkil bildirib. 

Öz növbəsində, jurnalistin həyat yoldaşı bildirib ki, o, hipertoniya, şəkərli diabetin kəskin forması, ürək-damar xəstəliyindən əziyyət çəkir. Bundan başqa, onun baş beynində kist var. 

Jurnalistin yetkinlik yaşına çatmamış iki övladı var.

Həbs qərarından şikayət veriləcək.