Azərbaycan XİN-in "Rus Evi"nin bağlanmasına dair məlumatı (yenilənib)

“Rossotrudniçestvo”nun Azərbaycandakı nümayəndəliyi olan Rusiya İnformasiya-Mədəniyyət Mərkəzi – “Rus Evi”nin hüquqi şəxs qismində qeydiyyatının mövcud olmadığı və təşkilatın Azərbaycan qanunvericiliyini ciddi şəkildə pozduğu barədə Rusiya tərəfinə məlumat verildikdən sonra, 3 fevral 2025-ci il tarixində "Rus Evi"nin fəaliyyətinə xitam verilməsi barədə Rusiya tərəfinə nota göndərilib. Bu barədə fevralın 6-da Azərbaycan XİN-in rəsmi nümayəndəsi Ayxan Hacızadə USAID-in və "Rossotrudniçestvo"nun Azərbaycanda fəaliyyətinin dayandırılması haqqında məlumatları şərh edərkən bildirib. 

Azərbaycan tərəfinin ölkəmizdə “Rus Evi”nin fəaliyyətinə xitam verilməsi barədə qərarından irəli gələrək, Rusiya tərəfindən bu istiqamətdə müvafiq tədbirlər həyata keçirilməsi gözlənilir, deyə o, əlavə edib.

Ümumiyyətlə Azərbaycan Respublikası ərazisində bu kimi təşkilatların (USAID və Rossotrudniçestvo) fəaliyyəti milli qanunvericiliyə, ölkələr arasında qarşılılıq prinsipinə və ikitərəfli əsasda əldə olunmuş razılıqların tələblərinə uyğun olaraq tənzimlənir, deyə XİN-in mətbuat katibi qeyd edib. 

* * *

2025-02-06 16:03

Azərbaycan XİN Bakıdakı "Rus Evi"ni bağlamaq istəyir

Fevralın 6-da hökumətyönlü KİV-lər "Rossotrudniçestvo"nun ölkədəki nümayəndəliyinin Azərbaycanda qeydiyyatı olmadığı üçün,  Azərbaycanın bu təşkilatın bağlanmasını tələb etdiyi haqqında məlumat yayıb. 

Turan Agentliyinin bu məlumatları təsdiq etmək xahişi ilə Azərbaycan XİN-ə ünvanladığı sorğular cavabsız qalıb. 

Eyni zamanda, "Rossotrudniçestvo"nun rəhbəri Yevgeni Primakov Rusiya KİV-lərinə bunun həqiqətən də belə olduğunu təsdiq edib.

Onun sözlərinə görə, RF XİN də, RF-nin Bakıdakı Səfirliyi də, "Rossotrudniçestvo"nun Bakıdakı nümayəndəliyi də "qeydiyyatda köməklik göstərilməsi xahişi ilə dəfələrlə Ədliyyə Nazirliyinə və Azərbaycan XİN-ə müraciət edib". Lakin bütün bu çağırışlar cavabsız qalıb, deyə 
Primakov "RİA Novosti"yə bildirib.

Göründüyü qədər, Bakı dekabrın 25-də Qroznı üzərində AZAL-ın sərnişin təyyarəsinin vurulmasına görə məsuliyyəti öz üzərinə götürməkdən 
imtina edən Moskvaya təzyiq göstərmək qərarına gəlib.

Əminliklə demək olar ki, rəsmi Bakı bununla kifayətlənməyəcək və gərginliyi artıraraq, Rusiyanın təyyarənin qəzasına görə təqsirini etiraf etməsinə və təzminat ödəməsinə nail olmağa çalışacaq.