Məhkəmə Azərbaycan Xalq Cəbhəsi Partiyası sədrinin şikayətini təmin etməyib

Fevralın 6-da hakim Faiq Qəniyevin sədrliyilə Bakı Apellyasiya Məhkəməsi Azərbaycan Xalq Cəbhəsi Partiyasının  sədri Əli Kərimlinin onu Cinayət Məcəlləsinin 147.1-ci  maddəsilə (böhtan) təqsirli bilərək 1500 manat cərimə edən Nəsimi Rayon Məhkəməsinin hökmündən şikayətini təmin etməyib.

“Bu hökmün hüquqi əsası yoxdur. Məhkəmə siyasi xarakter daşıyır”, - Kərimli deyib.

O bildirib ki, məhkəmənin qərarının ləğv olunması üçün hüququ yolların hamısından istifadə edəcək. “Ali Məhkəməyə müraciət edəcəm. O da şikayətimi təmin etməsə, Avropa İnsan Hüquqları Məhkəməsinə müraciət edəcəm”,- Kərimli qeyd edib.

2024-cü il dekabrın 2-də hakim Babək Pənahovun sədrliyilə Nəsimi Rayon Məhkəməsi Əli Kərimlini Cinayət Məcəlləsinin 147.1-ci maddəsilə (böhtan) təqsirli bilərək 1500 manat cərimə edilməsi barədə hökm çıxarıb.

Qarşı tərəfin vəkili məhkəmədən Kərimliyə 6 ay həbs istəyib.

Ərizəçi Aydın Əliyev Əli Kərimlinin böhtana görə məsuliyyətə cəlb edilməsini istəyib.

Kərimliyə qarşı iddia onun aşağıdakı fikirlərilə əlaqədar irəli sürülüb: “Partiyanın siyasi kursundan yayındığına və hakimiyyətlə əməkdaşlığa görə Azərbaycan Xalq Cəbhəsi Partiyasından xaric edilmiş Aydın Əliyev məhkəmənin qərarı ilə zorla Nəzarət-Təftiş Komissiyasının rəhbəri vəzifəsinə bərpa edilib”.

Əliyev Azərbaycan Xalq Cəbhəsi Partiyası Ali Məclisinin Rəyasət Heyətinin ümumi yığıncağının 10 iyun 2019-cu il tarixli qərarı ilə partiya sıralarından kənarlaşdırılıb.

Aydın Əliyev ümumi yığıncağın qərarının ləğv edilməsi, Azərbaycan Xalq Cəbhəsi Partiyası üzvlüyünə və Azərbaycan Xalq Cəbhəsi Partiyası Nəzarət- Təftiş Komissiyasının sədri vəzifəsinə bərpa olunması tələbilə Nəsimi Rayon Məhkəməsinə  müraciət edib 2020-ci ilin iyununda iddia təmin edilib.

Əli Kərimli həmin qərardan şikayət verib. Bakı Apellyasiya Məhkəməsi şikayəti təmin etməyib.