Qubad İbadoğlunun azadlığa buraxılması tələbi ilə ABŞ Konqresinə qətnamə təqdim edilib

Fevralın 6-da ABŞ Konqresinin 22 üzvü Xarici Əlaqələr Komitəsinə qətnamə təqdim edib və Azərbaycan hakimiyyətindən Qubad İbadoğlunun azadlığa buraxılmasını tələb edir.

Sənədin müəllifləri “Azərbaycan hökumətinin doktor Qubad İbadoğluna münasibətini pisləyir və onun dərhal azadlığa buraxılmasına çağırırlar”.

Sənəddə İbadoğlunun “heç bir dəlil olmadan çoxsaylı cinayət əməllərində” əsassız ittiham edildiyi bildirilir.

O, 2024-cü ilin aprel ayına qədər Bakı İstintaq Təcridxanasında son dərəcə bərbad şəraitdə saxlanılıb, sonra ev dustaqlığına buraxılıb və ona Bakını tərk etmək qadağan edilib.

Doktor İbadoğlunun səhhəti xeyli pisləşməkdə davam edir və ona lazımi tibbi yardım göstərilmir.

Q.İbadoğlunun hərəkəti  məhdudlaşdırılır, o, ailəsindən və akademik işindən təcrid olunur, ailəsi təqib və təhdidlərə məruz qalır, cə onun həbsdə saxlanması insan haqlarının ciddi şəkildə pozulmasıdır.

Bütün bunları nəzərə alaraq, “Konqres İbadoğluna qarşı rəftarı pisləyir, onun dərhal və qeyd-şərtsiz azad edilməsinə çağırır və dövlət katibini Azərbaycan hökuməti ilə bütün əlaqələrdə doktor İbadoğlunun azad edilməsini yüksək prioritet hesab etməyə çağırır”, - deyə qətnamədə qeyd olunur.