"Ananı baladan ayırmayın" - publisist

Son günlər Azərbaycanda jurnalistlərin həbsi siyasi və ictimai xadimlərin tənqidlərinə səbəb olub. 

Azərbaycanda Siyasi Məhbusların Monitorinq Mərkəzinin rəhbəri Elşən Həsənov deyib ki, siyasi məhbusların sayında azı 20 nəfər artım olacaq. 

"Biz bu günlərdə siyasi məhbusların yeni siyahısını ictimaiyyətə təqdim edəcəyik. Ölkədə siyasi təqiblər sahəsində durum çox ağırdır. Təqdim edəcəyimiz yeni siyahıda siyasi məhbusların sayında azı 15-20 nəfər artım olacaq. Biz son günlər həbs edilən iki jurnalisti - Şəmşad Ağa və 
Şahnaz Bəylərqızını, İmişli hadisələri ilə bağlı həbs edilən 13 nəfəri və bir neçə inanclı insanı siyasi məhbus kimi tanıyacağıq", deyə hüquq müdafiəçisi Turan Agentliyinə bildirib. 

Vətəndaş Hüquqları İnstitutunun rəhbəri Bəşir Süleymanlı jurnalistlərin yenidən həbs olunmasını "hakimiyyət tərəfindən daha bir azad sözü boğmaq cəhdi" adlandırıb. 

"Belə görünür ki, ölkədə müstəqil jurnalistikanın tam sıradan çıxarılması yekunlaşmayınca proses davam edəcək. Hazırda jurnalisitika klassik formatından çıxaraq qloballaşır. Teleqram kanalları, sosial şəbəkələrdən daha çox məlumatlar yayılır, nəinki saytlar, tv-lərdən. Bu da fake məlumatların çoxalmasına və ölkənin informasiya məkanının kənar təsirlərə məruz qalmasına səbəb ola bilər. Ona görə də hakimiyyət ölkə içində müstəqil jurnalistikanın güclənməsinə, xüsusən də həbs olunan peşəkar jurnalsitlərin azad olunmasına qərar verməlidir. Həbs çıxış yolu deyil, böhranı daha da dərinləşdirməkdir", deyə Süleymanlı Turan Agentliyinə bildirib.

Respublikaçı Alternativ (REAL) Partiyasının Siyasi Komitəsinin sədri Natiq Cəfərli bildirib ki, jurnalistlər Şəmşad Ağanın və Şahnaz 
Bəylərqızının həbsi onu deyir ki, hökumət ölkədə azad media istəmir.

"Son zamanlar mediaya qarşı addımların məntiqi budur ki, hökumət xaricdən maliyyələşən media istəmir. Bunu o zaman anlamaq olardı ki, ölkədə azad bazar və rəqabətli iqtisadi model, normal reklam bazarı olsun. Media reklamdan qazanmalı, reklama təlabat rəqabətdən doğmalıdır", deyə Cəfərli öz facebook səhifəsində yazıb.

Cəfərlinin dediyinə görə, Azərbaycanın reklam bazarı qonşu Gürcüstandan belə 50% azdır. Cəfərli reklam bazarının həcminin kiçik olmasını iqtisadiyyatın inhisarlaşması ilə izah edib. "İnhisarçıya isə reklam lazım deyil. Yəni "xaricdən maliyyə almayın" deyirsinizsə, daxildə iqtisadiyyatı açmalısız - bunun başqa alternativi yoxdur", deyə o bildirib.

Azərbaycan Xalq Cəbhəsi Partiyasının (AXCP) sədri Əli Kərimli bildirib ki, jurnalistlər saxta ittihamlarla saxlanılıb. "Şahnaz Bəylərqızı heç bir ictimai-siyasi prosesin iştirakçısı deyildi. Heç rejimin korrupsiyasını da araşdırmırdı. Sadəcə iqtidarlı - müxalifətli müxtəlif ictimai-siyasi xadimlərlə müsahibələr təşkil edirdi. 

Belə bir jurnalisti də həbs etmək o deməkdir ki, rejim həqiqətən də jurnalistikanı peşə olaraq cinayət sayır.
Şahnaz xanıma, Şəmşad bəyə və bütün həbs olunmuş jurnalistlərə, siyasi məhbuslara azadlıq tələb etmək indi hər bir ləyaqətli azərbaycanlının borcudur", deyə Kərimli facebook səhifəsində yazıb.

"Yenə də gecə əməliyyatı, yenə də uydurma qaçaqmalçılıq ittihamı... İctimaiyyət həbslərə son qoyulmasını gözləyir, hakimiyyət isə repressiyaları genişləndirir. Şəmşad Ağanın, Şahnaz Bəylətqızının və bütün siyasi məhbusların azad edilməsinə çağırırıq", deyə Müsavat Partiyasının sədri İsa Qəmbər facebook-da yazıb. 

O, əsassız ittihamlarla həbsdə olan xanım jurnalistlərin sayının 8-ə çatdığını diqqət çəkib.
Publisist Kəramət Böyükçöl də jurnalistlərin həbsini pisləyib. "Mən artıq hakimiyyətdən ədalət tələb etmirəm, ondan sadəcə mərhəmət umuram. 
Çünki ədalət tələb edəcək gücdə deyiləm. Həm də "tələb" sözü daha üzümdə acı bir gülüş doğurur. 

Şəmşadı da, Şahnaz xanımı da azad edin. İkisi də alınmırsa, heç olmasa Şahnaz xanımı tutmayın. Ananı baladan ayırmayın", deyə publicist qeyd edib.