Yeni hüquq-müdafiə strukturu yaradılıb

Bakı/26.09.23/Turan: Bu gün Azərbaycanda yeni "Müdafiəçi" Hüquq Mərkəzi təsis edilib.

Yeni qurumun yaradıcıları ona zərurəti 2013-2014-cü illərdə Qeyri-hökumət təşkilatları haqqında qanunvericiliyə edilən mürtəce dəyişikliklərlə əlaqədar ictimai müdafiə institutlarının aradan qaldırılmasından və 2018-ci ildə məhkəmələrdə təmsilçilik institutunun ləğv edilməsindən sonra vətəndaşların hüquqi yardım vasitələrinə olan tələbatı ilə izah edirlər.

Ölkədəki "hüquqi böhran" və hüquqi yardım çatışmazlığı şəraitində “Müdafiəçi” Hüquq-Müdafiə Mərkəzinin yaradılması qərara alınıb, qurumun təşkilatçılarının məlumatında deyilir.

Yeni Mərkəz insan hüquqları sahəsində ixtisaslaşan hüquqşünasların Demokratik Təşəbbüslər İnstitutu (sədr, Mərkəzi Seçki Komissiyasının keçmiş üzvü Akif Qurbanov) və digər vətəndaş təşəbbüsləri çərçivəsində treninqlər keçmiş gənc hüquqşünasların əməkdaşlığı nəticəsində fəaliyyətə başlayır.

Həmçinin vəkillərlə əməkdaşlıq nəzərdə tutulur.

Yeni Mərkəz ayrı-ayrı şəxslərin və təşkilatların siyasi və digər əlaqəli hüquqlarının pozulması ilə bağlı hüquqi yardım göstərmək niyyətindədir.

Əsasən, məsləhət xidmətləri, məhkəmələrdə, inzibati orqanlarda çəkişmə işlərinin hazırlanması, yerli və beynəlxalq məhkəmə instansiyalarında təmsilçilik xidməti təklif olunur.

Bununla yanaşı, mürtəce qanunların ortadan qalxması və qanunvericiliyin təkmilləşdirilməsi istiqamətində təkliflər, analizlər hazırlanacaq.06В-