Zərərçəkən ailə məhkəmə ədalətsizliyindən şikayət edir

Cümə axşamı Bakı sakini Rəsul Quliyev oğlu Ramin Quliyevin avtoqəzaya düşməsilə bağlı aparılan təhqiqat və məhkəmə işindən narazı olması ilə əlaqədar RATİ-də mətbuat konfransı keçirib. 

Onun sözlərinə görə, oğlu 2013-cü il oktyabrın 3-də Bakı-Şamaxı yolunun Sulutəpə qəsəbəsi yaxınlığındakı hissəsində yol qəzasına düşüb. Onu vuran şəxs R.Quliyevi köməksiz vəziyyətdə qoyaraq qaçıb. Sonradan da vurduğu şəxsin durumu ilə maraqlanmayıb. Qəza yerində qalan R.Quliyevi 1 saylı klinik xəstəxanaya qardaşı və hadisə şahidləri çatdırıblar.  

Qəza zamanı R.Quliyev ən çox ayaqlarından xəsarət alıb. Belə ki, hər iki ayağında çoxlu sınıqlar var. İmkansızlıq üzündən R.Quliyev xəstəxanada ancaq bir ay yatıb, noyabrdan müalicəsi ev şəraitində davam edir. İşin təhqiqatını respublika Dövlət Yol Polisi İdarəsinin təhqiqat və istintaq bölməsi əməkdaşları aparırlar. Zərərçəkənin atası təhqiqatçı Rəşad İsmayılovu işi düzgün təhqiq etməməkdə, qəza törədənlərin xeyrinə fəaliyyətdə ittiham edib. Belə ki, R.İsmayılov R.Quliyevin ağır xəsarət almasına baxmayaraq, bunu  yüngül xəsarət kimi qeydə aldırıb. Qəza törədən şəxsin zərərçəkəni köməksiz qoyması,  hadisə yerindən qaçması kimi ağırlaşdırıcı halları qeydə almayıb.

Amma Nəsimi Rayon Məhkəməsinin tibb-ekspertiza bölməsi zərərçəkən R.Quliyevin xəsarətlərinin ağır olması haqda rəy verib. Beləliklə, zərərçəkən tərəfi təhqiqat mərhələsində işin tam və obyektiv araşdırılmaması qənaətinə gəlib. 

İşə dekabrın 28-də Abşeron Rayon Məhkəməsində baxılıb. Qəza törədən və cavabdeh tərəf olan Sərhəng Ağayev məhkəmədə zərərçəkən tərəfi 3500 manat pul tələb etməkdə ittiham edib. R.Quliyev cavabdehin bu iddiasını böhtan adlandırıb. Hadisə baş verəndən bu yana həmin şəxsi ilk dəfə məhz məhkəmə zalında gördüyünü söyləyib. R.Quliyev həqiqəti çatdırmaq istədikdə hakim zərərçəkən tərəfi dinləmədən “siz çox danışırsınız, zaldan çıxın” deyərək onu zaldan çıxarıb. Bunun  ardınca hadisə şahidləri də zaldan çıxıblar. Sonradan prokuror zərərçəkən tərəfi zala dəvət edib. Zərərçəkənin atası R.Quliyevin ardınca anası Brilyant Quliyeva da zala daxil olmaq istədikdə nəzarətçilər onu itələybilər, qapını üzünə çırpıblar. 

Növbəti məhkəmə prosesi  yanvarın 16-nə təyin edilib. 

“Mən məhkəmə prosesindən müsbət heç nə gözləmirəm, odur ki, məsələni ictimailəşdirməklə ailəmizin haqsızlığa uğradığını, təzyiq və ədalətsizliyə məruz qaldığını cəmiyyətə çatdırmaq istəyirəm”, -  Q.Quliyev bildirib.-05C-