Ziyalılar Forumu təşkilati strukturlarını möhkəmləndirir və fəaliyyətini genişləndirir

Son aylar ictimaiyyət nümayəndələri tərəfindən Ziyalılar Forumuna qurumun  genişləndirilməsinə və onun fəaliyyətinin gücləndirilməsinə yönələn çoxlu təkliflər daxil olur.  Forumun Təsisçilər Şurası çoxsaylı təklifləri öyrənərək və müzakirə edərək Ziyalılar Forumunun Məşvərət Məclisinin yaradılması barədə qərar qəbul edib.

    Məşvərət Məclisi forumun fəaliyyətini planlaşdıran və onun qərarlarını həyata keçirən işçi orqan olacaq. Bu barədə Forumun Turan-a daxil olan məlumatında deyilir.

    Məşvərət Məclisinə Forumun təsisçiləri ilə yanaşı yazıçı Çingiz Hüseynov, bəstəkar Cavanşir Quliyev, şair Musa Yaqub, Ziyalılar Hərəkatının sədri Eldəniz Quliyev, KİV rəhbərləri Elçin Şıxlı, Arif Əliyev, Mehman Əliyev, Qulu Məhərrəmli, ictimai xadimlər Ramiz Abutalıbov, Gültəkin Hacıyeva, Arzu Abdullayeva. Zəfər Quliyev, Erkin Qədirli daxildir.

    Məşvərət Məclisinin tərkibinin formalaşması prosesi yaxın vaxtlarda başa çatdırılacaq. 

    Bu il iyunun 25-də Məsləhət Məclisinin ilk iclası keçirilib. İclasda Ziyalılar Forumunun yaxın aylar üçün tədbirlər planı müzakirə olunub və təsdiqlənib. Korrupsiya və onun ictimai həyatın bütün sahələrinə təsiri problemi ilə bağlı Ziyalılar Forumunun növbəti yığıncağının keçirilməsi qərara alınıb.

    Məşvərət Məclisi könüllü ianə hesabına ADR qurucularının panteonunun yaradılması üzrə İctimai Komissiyanın yaradılması haqda qərar qəbul edib. Komissiyaya Rüstəm İbrahimbəyov rəhbərlik edəcək.

    Məşvərət Məclisi Azərbaycanda siyasi məhbuslar məsələsini də müzakirə edib. 

    Bir qrup ictimai fəalın həbsdən azadlığa buraxılması müsbət qiymətləndirilib və qeyd olunub ki, “aprel mitinqi” iştirakçılarından bir neçəsi, bəzi qəzetlərin bir qrup jurnalisti və baş redaktoru, Quba hadisələrinin iştirakçıları, həmçinin hicab taxılmasına məhdudiyyət  qoyulmasına etiraz edən şəxslər hələ də həbsdədir.

    Ziyalılar Forumu hakimiyyəti ictimai fəaliyyətinə və siyasi baxışlarına görə həbs olunan bütün məhbusları azad etməyə çağırıb. -02D-