Avropa Məhkəməsinin qərarları niyə şübhə yaradır? – Fuad Həsənov Çətin sualda

Bakı/04.07.23/Turan: Bu ilin may ayında Avropa İnsan Hüquqları Məhkəməsi (AİHM) hüquq müdafiəçisi Oqtay Gülalıyevin hüquqlarının pozulması ilə bağlı şikayəti rədd etdikdən sonra Avropa Məhkəməsinin Azərbaycanla bağlı son dönəmlər çıxardığı qərarları şübhə altına alan vətəndaş cəmiyyəti üzvlərinin əndişələri daha da artıb.

Əvvəllər Azərbaycanda daha çox Avropa Məhkəməsinin qərarlarının yerinə yetirilməməsindən şikayətlər çoxluq təşkil edirdisə, son vaxtlar şikayətçilərin bir çoxu Avropa Məhkəməsinin çıxardığı qərarlardan narazılıq edirlər. Kompensasiyaların azlığı, şikayətlərin rədd olunması və bu kimi digər məsələlər Avropa Məhkəməsinə üz tutanları narazı salır. Vətəndaş cəmiyyəti üzvləri kluarlarda Məhkəmənin son vaxtlar çıxardığı qərarlara şübhə ilə yanaşır və həmin qərarların ədalətliliyini sorğulayırlar.

“Kürü diplomatiyası” ilə AŞPA deputatlarının Azərbaycan tərəfindən ələ alındığını xatırladan vətəndaş cəmiyyəti üzvləri indi də hökumət tərəfindən hansısa yolla Avropa Məhkəməsi hakimlərinə təsir edildiyinin mümkünlüyünü istisna etmirlər.

Hüquq müdafiəçisi Fuad Həsənov bu və gündəmdə olan digər mövzular haqda Kamran Mahmudovun təqdimatında yayımlanan “Çətin sual” verilişində danışır.