Azər Qasımlı: “Videokompromat bumeranq kimi hakimiyyətin özünə qayıdır”

Bakı/30.03.21/Turan: “Bu videokompromatları yaymaqda məqsəd kimlərisə qorxutmaq, susdurmaqdan daha çox  diqqəti  “Tərtər işi” kimi ciddi məsələdən yayındırmaq, gündəmi dəyişdirmək cəhdidir”,- siyasətçi Azər Qasımlı Turan-ın “Çətin sual” prorqamının 30 mart 2021-ci il tarixli “Videokompromat siyasi mübarizədə” mövzusuna dair buraxılışında deyib. 

Azər Qasımlı deyir ki, bu günlərdə Demokartik Qüvvələrin Milli Şurasının  sədri Cəmil Həsənlinin qızının olduğu iddia edilən intim videonun yayılmasında da məqsəd məhz gündəmi dəyişmək cəhdidir: “Belə hallar ilk dəfə deyil, müxtəlif illərdə baş verib və heç birində də şəxsi həyata müdaxilə edənlərin kimlikləri açılmayıb”, - Azər Qasımlı bildirib.

O deyib ki, belə kompromatlardan hansısa jurnalisti, ictimai və ya siyasi fəalı susdurmaq üçün istifadə edilir: “Amma Cəmil Həsənli hakimiyyəti necə əvvəllər tənqid edirdisə, indi də elə tənqid edir. Ona görə deyirəm ki, bu videonun yayılmasında məqsəd kimisə susdurmaq yox, gündəmi dəyişmək idi”.

Siyasətçi fikrini belə əsaslandırır ki, bunu edənlər elə düşünüblər ki, diqqət daha çox bu videonun üzərinə cəmlənəcək, hamı bundan danışacaq və bununla da gündəm dəyişəcək. O deyir ki, bu məsələdə hakimiyyətin hesablaması səhv olub, cəmiyyətdən təpki alıb. Siyasətçi vuğulayır ki, belə hallar həmişə bumeranq effekti verir, bu dəfə də belə oldu.

Azər Qasımlı hesab edir ki, belə videolar hansısa qrup tərəfindən yayıla bilməz, burada hakimiyyətin əli var və əgər bu hakimiyyətin işi deyilsə, məsələni aşkara çıxarması o qədər də çətin məsələ deyil.

O vurğulayıb ki, hələ ki rəsmi olaraq hakimiyyət bu məsələdə əlinin olmaması ilə bağlı hr hansı açıqlama verməyib,yalnız bəzi media qurumlarında hakimiyyətin adından bu işdə əlinin olmaması barədə yazılar yayılıb. Siyasətçi deyir ki, cəmiyyətdən təpki gördüyü üçün hakimiyyət qeyri-rəsmi olsa da “geriyə addım” atmalı olub və bu məsələ ilə bağlı Yeni Azərbaycan Partiyası Səbayel təşkilatının üzvü  Elvar Mirzəoğlu partiyadan istefa verib.

“Belə halların olmaması üçün nələr edilməlidir” sualını cavablandıran Azər Qasımlı hesab edir ki, bunun üçün öncə seçkilər yolu ilə hakimiyyət dəyişməlidir, parlamentin nəzarət funksiyası güclənməli, icra hakimiyyətinin səlahiyyətləri  azaldılmalı, qanunun aliliyi təmin olunmalı, bütün hüquq və azadlıqların qorunması təmin edilməlidir.-05D-