Azərbaycan seçkiyə hazırlaşır? – Ələsgər Məmmədli Çətin sualda

Bakı/19.07.23/Turan: REAL Partiyasının Siyasi Komitəsinin üzvü, deputat Erkin Qədirli yaxın bir ilyarım müddətdə Azərbaycanda dörd seçki keçiriləcəyini güman edir.  Bu barədə “Telegram” kanalında yazan deputat 2023-cü ilin payızında referendum, gələn ilin noyabrında Milli Məclisə seçkilər, dekabrda bələdiyyə, 2025-ci ilin aprelində isə prezident seçkilərinin keçiriləcəyini qeyd edib.

“İyun ayında Milli Məclis dövlət büdcəsinə bir sıra dəyişikliyi təsdiqlədi. O dəyişikliklərin arasında 2023-ü ilin qalan hissəsində seçki xərclərinin az qala 50 faiz artırılması var. Bu, böyük bir artımdır və referendumun məhz bu il olacağını söyləməyə tutarlı əsas verir. Boşuna bu qədər pul ayırmazlar”, – deputat vurğulayıb.

REAL Partiyasının üzvü referendumun konstitusion islahatlarla bağlı olacağını düşünür:

“Tam yeni bir konstitusiyamı olacaq, yoxsa indikinə dəyişikliklər ediləcək? Ritorik sual deyil. İndiki konstitusiyada bir çox maddəyə əlavə və dəyişikliklərin edilməsi qadağandır. Konstitusiyanın mətni bunu aydın qadağan edir. Odur ki, əgər həmin maddələrə dəyişiklik etmək niyyəti varsa, onda gərək tam yeni bir konstitusiya qəbul olunsun. Bu, prinsipcə mümkündür, amma buna gediləcəkmi? Burasını söyləmək çətindir. Bu seçimin həm müsbət, həm mənfi tərəfləri vardır. Riskləri də az deyil. İndiki konstitusiyaya dəyişikliklərin ehtimalı daha yüksəkdir”.

Erkin Qədirli hesab edir ki, yerli özünüidarəetmə sistemin köklü islahatı aparılacaq. İcra hakimiyyətinin başçıları təsisatı ləğv olunacaq. Deputat hesab edir ki, öncə bələdiyyələr böyüdülməli və gücləndirilməlidir. Deputat Azərbaycanda inzibati-ərazi bölgüsünün də dəyişdirilməli olduğunu bildirib.

“ İnzibati-ərazi vahidlərin arasında Naxçıvan Muxtar Respublikası da var. Onun ləğv oluna biləcəyi ehtimalı ciddi düşünülürsə, onda onu ancaq konstitusion referendumla etmək mümkün olacaq. Bunun da müsbət və mənfi yan təsirləri mümkündür”.

Deputatın dedikləri barədə hüquqşünas Ələsgər Məmmədli Kamran Mahmudovun təqdimatında yayımlanan “Çətin sual” verilişində danışır.