Əfqan Muxtarlı: İndiki halda istintaqdan gözləntim böyük deyil

Bakı/12.04.21/Turan: “Mənim Gürcüstana qayıtmaqda məqsədim 2017-ci il mayın 29-da bu ölkədən oğrulanaraq Azərbaycana təhvil verilməyimlə bağlı başlanmış cinayət işinin vəziyyəti barədə məlumat əldə ermək və ifadə vermək olub”. Bunu bir neçə gün öncə Almaniyadan Gürcüstana qayıtmış jurnalist Əfqan Muxtarlı Turan-ın “Çətin Sual” proqramının 2021-ci il 12 aprel tarixli buraxılışında bildirib.

Onun sözlərinə görə, 2020-ci ilin martında Azərbaycandan Almaniyaya göndəriləndən sonra Gürcüstan prokurorluğuna telefon vasitəsilə ifadə verib, amma keyfiyyətinə etibar etməyib. Odur ki, özü iştirak edərək ifadə vermək istəyib.

Muxtarlı belə bir təfərrüatı xatırladıb ki, 6 ay öncə də Gürcüstan tərəflə əlaqə saxlayaraq ifadə vermək istədiyini bildirib, Gürcüstana gələ bilməsində problem olmadığı deyilib, sənədləri hazırlayıb, Almaniyada təyyarəyə minmək mərhələsində “Avropa İttifaqı ölkələrində daimi oturum izni olmayanların Gürcüstana buraxılmadığı” adı ilə səfərə getməyə qoymayıblar.

“Bu dəfə isə Amaniyadan birbaşa Gürcüstana gəlmədim. İstanbula uçdum, oradan təyyarə ilə Tbilisiyə gəldim. Bu dəfə də İstambulda bir saata qədər məni yubatdılar, nəhayət ki, sonunda icazə verdilər”, deyə Muxtarlı bildirib. 

Muxtarlı vurğulayıb ki, vəkililə birgə Gürcütan Baş Prokurorluğunda 10 saata yaxın ifadə verib.

Jurnalist deyir ki, 2017-cu il mayın 29-da oğrulanmasından xeyli əvvəl ətrafında izlənmə prosesi müşahidə edib, bu barədə Gürcüstanın müvafiq orqanlarına müraciət göndərib, amma hər hansı tədbir görülməyib: “Hesab edirəm ki, o zaman Gürcüstandan oğulanmağımda Azərbaycan və Gürcüstanın sərhəd, xüsusi xidmət orqanlarının, Gürcüstanın kriminal polisinin, Loqodexi keçid-sərhəd məntəqəsi rəhbərliklərinin əli var. Mən oğurlanan günü aparıldığım istiqamətdə bir kamera belə işləməyib. Bu isə təsadüf sayılmaz”, deyə o bildirib.  

Gürcüstanda aparılan istintaqla bağlı gözləntiləri haqda danışan Muxtarlı deyib ki, böyük gözlənti və ümidləri yoxdur, yalnız hakimiyyət dəyişikliyi olarsa, istintaqdan nəticə gözləyə bilər.

O, Gürcüstanda bir neçə gün qaldıqdan sonra Almaniyaya qayıdacağını bildirib.

Xatırladaq ki, oturum izni ilə Gürcüstanda yaşayan jurnalist Əfqan Muxtarlı 2017-ci il mayın 29-da “yoxa” çıxıb və səhəri gün Azərbaycanda həbs edilib. Dediyinə görə, Tbilisidə saxlanıb, işgəncə verilib, zorla sərhədə gətirilərək Azərbaycan tərəfinə təhvil verilib. Üstəlik, cibinə 10 min avro pul qoyulub. Azərbaycan hökuməti isə jurnalisti Cinayət Məcəlləsinin hakimiyyət nümayəndəsi xidməti vəzifələrini yerinə yetirərkən ona qarşı həyat və sağlamlıq üçün təhlükəli olan zor tətbiq etmə maddəsi (315.2) ilə ittiham edirdi.

Bundan başqa, ona dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə (318.1) və qaçaqmalçılıq (206.1) maddələri ilə ittiham irəli sürülmüşdü və həmin ittihamlarla 6 il azadlıqdan məhrum edilmişdi. 2020-ci il martın 17-də jurnalist gözlənilmədən həbsdən azad edilib və dərhal Almaniyaya göndərilib.

Beynəlxalq hüquq müdafiə təşkilatları Əfqan Muxtarlını siyasi məhbus kimi tanıyıblar. -05B-