Ermənistanda seçki öncəsi durum və Ter-Petrosyanın Qarabağ etirafı – Rauf Mirqədirov

Ermənistanda seçki öncəsi durum və Ter-Petrosyanın Qarabağ etirafı – Rauf Mirqədirov saat 16:00-da “Çətin sual" qarşısında

Bakı/17.06.21/Turan: Ermənistanın ilk prezidenti, Erməni Milli Konqresinin lideri Levon Ter-Petrosyan "Novosti-Armeniya" saytına, ölkənin ikinci prezidenti Robert Koçaryanın Şuşa və Hadrutu geri qaytarmaq barədə bəyanatını şərh edərkən deyib ki, bütün dünya Qarabağı Azərbaycan ərazisi hesab edir.

“Azərbaycanı geri çəkilməyə kim vadar edəcək? Bütün dünya Qarabağı Azərbaycan ərazisi hesab edir. O, ərazinin bir hissəsini bərpa edib, heç kim Azərbaycanı qınamadı. Bu dünyanın qanunlar belədir. Bizi məcbur etməyə çalışırlar ki, Dağlıq Qarabağın Azərbaycan ərazisi olduğuyla razılaşaq. Artıq heç nə bizdən asılı deyil, hər şey bitib", deyə Ter-Petrosyan qeyd edib.

Belə bir bəyanatı Levon Ter-Petrosyanın Ermənistanda planlaşdırılan növbədənkənar parlament seçkilərindən öncə, eləcə də Azərbaycan və Türkiyə arasında Şuşa bəyannaməsinin imzalandığı ərəfədə səsləndirməsi xeyli suallar yaradır.

İyunun 20-də Ermənistanda növbədənkənar parlament seçkiləri keçiriləcək. Seçkilərdə ölkənin bütün keçmiş rəhbərləri və hazırkı baş nazir iştirak edir. Levon Ter-Petrosyan Erməni Milli Konqresinin siyahısına başçılıq edir. İkinci prezident Robert Koçaryan "Ermənistan" blokunun siyahısında ilk sıradadır. Baş nazirin səlahiyyətlərini icra edən Nikol Paşinyan "Vətəndaş sazişi" partiyasının lideridir. Ermənistanın üçüncü prezidenti Serj Sarkisyan partiya siyahılarında göstərilməsə də, onun başçılıq etdiyi Respublika Partiyası seçkilərə "Şərəf duyuram" bloku ilə qatılır.

Siyasi şərhçi Rauf Mirqədirov saat 16:00-da Kamran Mahmudovun təqdimatında yayımlanan “Çətin sual” verilişində Levon Ter-Petrosyanın bəyanatını və Ermənistandakı seçki öncəsi vəziyyəti şərh edəcək.