Hafiz Babalı da saxlanıldı. Son günlər həbs olunan jurnalistlərin sayı 10-u keçdi. – Xalid Ağəliyev saat 16:00-da Çətin sualda

Bakı/14.12.23/Turan: Ötən gün daha bir jurnalist Hafiz Babalı saxlanılıb. Dekabrın 13-də Bakı şəhər Baş Polis İdarəsinin (BŞBPİ) əməkdaşları jurnalistin evində axtarış aparıblar. Daha sonra isə Hafiz Babalı BŞBPİ-nə aparılıb. Hafiz Babalı Turan agentliyinin iqtisadiyyat şöbəsinin redaktoru idi.

Jurnalist Hafiz Babalı “Abzas Media” nəşrinin əməkdaşlarına qarşı cinayət işi çərçivəsində saxlanılıb. Bu barədə "Turan"a Daxili İşlər Nazirliyinin mətbuat xidmətinin əməkdaşı İbrahim Əmiraslanlı bildirib.

Bununla da “AbzasMedia” işi ilə bağlı saxlanılan jurnalistlərin sayı 5-ə çatdı.

Son zamanlar hökumətin maliyyələşdirdiyi media orqanlarında müstəqil media qurumu olan “AbzasMedia” ilə bağlı kompromat xarakterli materiallar dərc edilirdi. Həmin materiallarda Hafiz Babalının da adı hallanırdı.

“AbzasMedia”nın direktoru Ülvi Həsənli və ictimai fəal Məhəmməd Kekalov noyabrın 20-də saxlanılıblar. Sonradan Ülvi Həsənliyə qarşı Cinayət Məcəlləsinin 206.3.2. (qabaqcadan əlbir olan bir qrup şəxs tərəfindən qaçaqmalçılıq) maddəsi ilə ittiham verilib.

“AbzasMedia”nın baş redaktoru Sevinc Vaqifqızı isə noyabrın 21-də Azərbaycana dönərkən hava limanında saxlanılıb. Ona qarşı da eyni ittihamla cinayət işi açılıb. Noyabrın 21-də hər ikisi Xətai Rayon Məhkəməsinin qərarı ilə dörd ay müddətinə azadlıqdan məhrum edilib. Onlar həbslərini siyasi sifariş sayır, ittihamları qəbul etmirlər.

Məhəmməd Kekalov da “AbzasMedia”nın direktoru Ülvi Həsənli və baş redaktoru Sevinc Vaqifqızıyla eyni cinayət işi üzrə məsuliyyətə cəlb olunub və 3 ay 27 gün azadlıqdan məhrum edilib. Daha sonra isə media qurumla əməkdaşlıq etmiş jurnalist Nərgiz Absalamova ifadə verməyə çağırılıb və saxlanılıb. Ona qarşı da eyni ittihamla cinayət işi açılıb və barəsində 3 aylıq həbs qətimkan tədbiri seçilib. Sevinc Vaqifqızı və Ülvi Həsənlinin evində və “AbzasMedia”nın ofisində axtarış aparılıb. Medianın ofisindən 40 min avro tapıldığı iddia edilib.

Hafiz Babalı  da “AbzasMedia” işində həbs olunan jurnalistlərlə eyni ittihamla, Cinayət Məcəlləsinin 206.3.2. (qabaqcadan əlbir olan bir qrup şəxs tərəfindən qaçaqmalçılıq) maddəsi ilə təqsirləndirilir.

Son günlər həbs olunan jurnalistlərin sayı 10-u ötüb. Onlardan 5-i “AbzasMedia”-nın, 2 nəfər “Kanal 13” internet televiziyasının, 1-i “Kanal 11” internet televiziyasının, digərləri isə başqa saytların əməkdaşlarıdırlar.

Niyə ard-arda jurnalistlər həbs olunurlar?

Media Hüququ qrupunun rəhbəri Xalid Ağəliyev Kamran Mahmudovun təqdimatında yayımlanan “Çətin sual” verilişində danışır.