İran Azərbaycana nota verdi. Azərbaycanın cavabı nə olacaq? – Zərdüşt Əlizadə Çətin sual qarşısında

Bakı/15.11.22/Turan: Azərbaycan Respublikasının İrandakı səfiri Əli Əlizadə İran Xarici İşlər Nazirliyinə çağırılıb və ona etiraz notası təqdim edilib.

İran mətbuatı xəbər verir ki, bu barədə noyabrın 14-də jurnalistlərə İran Xarici İşlər Nazirliyinin nümayəndəsi Naser Kanaani Çafi məlumat verib. Onun sözlərinə görə, etiraz notası Azərbaycan vətəndaşlarının İranda “cinayətkar  fəaliyyəti" ilə bağlı verilib. O, səfirə iddiaları təsdiqləyən dəlil və sübutların təqdim edildiyini bildirib.

Amma Azərbaycanın əsas media orqanlarında nədənsə bu məlumata yer verilməyib. Digər yerli media orqanlarına məlumatı Azərbaycan Xarici İşlər Nazirliyinin Mətbuat xidmətinin rəhbəri Ayxan Hacızadə təsdiq edib. Amma XİN rəsmisi bəyanatın mətni ilə bağlı açıqlama verməyib.

Bundan sonra Azərbaycan Respublikasının xarici işlər naziri Ceyhun Bayramov ilə İran İslam Respublikasının xarici işlər naziri Hüseyn Əmir Abdullahian arasında telefon danışığı baş tutub.Tərəflər iki ölkə arasında münasibətlərdə yaranmış son vəziyyətin, ictimai ritorika ilə bağlı narahatlığın və digər mövcud problemlərin qarşılıqlı dialoq və anlaşma çərçivəsində həll edilməsinin zəruri olduğunu bildiriblər.

Baş verənlərlə bağlı siyasi şərhçi Zərdüşt Əlizadə Kamran Mahmudovun təqdimatında yayımlanan “Çətin sual” verilişində danışır.