Məmurlar böyük məbləğdə vəsaitləri tender adı ilə mənimsəyirlər? – Bəxtiyar Hacıyev “Çətin sual" qarşısında

Bakı/26.11.21/Turan: Son günlər mediada və sosial şəbəkələrdə Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun elan etdiyi tenderlərin qalibinin nazir müavini Anar Kərimovun qaynına aid şirkətin olduğuna dair məlumatlar yayılıb. Yayılan məlumatlara görə, Əmək və Əhalinin Sosial Müdafiəsi Nazirliyi rüşvətxorluğa qarşı mübarizənin idarəetmə sistemləri beynəlxalq standartının tətbiqi ilə əlaqədar, məsləhət xidmətlərinə dair elan etdiyi açıq tenderin qalibi kimi “Ekvita Consulting” MMC şirkətini seçib. Qalib şirkətə 30 min manat ödəniləcək.

Bundan əvvəl də başqa bir tenderlə əlaqəli eyni şirkətə DSMF tərəfindən 52,5 min manat, ƏƏSMN tərkibindəki Dövlət Məşğulluq Agentliyi tərəfindən isə 920 min manat ödənilib.

Medianın yazdığına görə, şirkətin direktoru İlqar Mehti adlı şəxsdir. Məlum olub, o həmçinin Əmək və Əhalinin Sosial Müdafiəsi nazirinin müavini Anar Kərimovla yeznə-qayındır.

Bundan başqa həmin şirkət Dünya Bankından kredit hesabına reallaşdırılan, 100 milyon dollarlıq "Məşğulluğa Dəstək Layihəsi"nin bir, yaxud bir neçə komponentini icra edir. Buna məqsədlə həmin şirkətə 9 milyon 265 min dollar verilib.

Məsələni ictimailəşdirən ictimai-siyasi fəal Bəxtiyar Hacıyev Kamran Mahmudovun təqdimatında yayımlanan “Çətin sual” verilişində bu barədə daha ətraflı danışir.