M.Hüseynov: Bu, fəaliyyətimi məhdudlaşdırmaq cəhdidir

Bakı/15.03.21/Turan: “Turan” İnformasiya Agentliyinin “Çətin sual” verilişinin 2021-ci il 15 mart tarixli “Media fəalları zərbə alıtnda” adlı buraxılışı tanınmış videobloger Mehman Hüseynovun martın 14-də polis tərəfindən saxlanılması ilə bağlı olub.

Verilişdə iştirak edən Hüseynov deyib ki, korrupsiya faktlarını araşdırmaq üçün Novxanı kəndində olub, ilkin araşdırmalar aparıb, bu araşdırmalarda drondan da istifadə edib: “Mənim bu addımı atmağım son vaxtlar rəsmi Bakının korrupsiyaya qarşı mübarizə aparılması, ictimayyətin bu barədə aidiyyatı qurumlara xəbər verməsi kimi müraciətlərindən irəli gəlirdi. Mən bundan da əvvəl bu istiqamətdə fəaliyyət göstərmişəm, indi də davam edirəm və buna görə həbsdə də yatmalı olmuşam”, deyə Mehman Hüseynov bildirib.

Bloger konkret olaraq martın 14-də saxlanılmasını vətəndaş kimi, bloger kimi fəaliyyətinin məhdudlaşdırılmasına cəhd kimi dəyərləndirir. Onun sözlərinə görə, martın 14-də Novxanıda korrupsiya ilə bağlı ilkin araşdırma aparıb, amma konkret olaraq hansısa çəkilişlər aparmayıb. Amma geri dönəndə saxlanılaraq Abşeron Rayon Polis İdarəsinə gətirilib, ilkin izahatlar alınıb, gözləri bağlı halda başqa bir məkana gətirilib və buradan da avtomobillə aparılaraq metronun “Gənclik” stansiyası yanında sərbəst buraxılıb.

Drondan istifadə ilə bağlı bloger əlavə edir ki, bu məsələdə qanunda qadağa yoxdur, amma boşluq var. Belə ki, bu texniki vasitənin , ölkəyə gətirilməsi üçün aidiyyatı qurumlardan icazə alınması tələbi olsa da, istifadə edilməsilə bağlı tələblər yoxdur. Yeri gəlmişkən bloger dronun polis tərəfindən saxlandığını bildirib.

Mehman Hüseynovun sözlərinə görə, polis idarəsində də daha çox drondan istifadə ilə bağlı sorğu-sual edilib. Bloger vurğulayır ki, saxlanılmasına səbəb heç də korrupsiyaya qarşı mübarizə aparması deyil, məqsəd bloger kimi fəaliyyətinin məhdudlaşdırılması olub.

Onun fikrincə, ölkədə korrupsiyaya qarşı mübarizə üçün drona, hansısa texniki vasitəyə ehtiyac yoxdur, istək olsa, bu, yetərlidir. Amma texniki vasitələrdən istifadə bunu görüntü olaraq ortaya qoyur.

Hüseynov məsələ ilə bağlı məhkəməyə müraciət etməyi düşündüyünü də bildirib. -05D-