Ann Lindenin regionda etimad tədbirləri və humanitar hüquq haqqında dedikləri

Bakı/15.03.21/Turan: Hakimiyyət bir çox jurnalistləri, o cümlədən xarici kütləvi informasiya vasitələrinin müxbirlərini ATƏT sədrinin bugünki brifinqinə dəvət etməyib. Azərbaycan Xarici İşlər Nazirliyinin bu qərarını nə ilə əsaslandırdığı aydın deyil. Təcrübədə bu, ATƏT sədri Ann Lindenin çıxışının mətbuatın əksər hissəsi üçün naməlum qalmasına gətirib çıxarıb.

Azsaylı hökumətyönlü kütləvi informasiya vasitələrinə gəlincə, onlar Lindenin çıxışından az əhəmiyyətli iki abzası təqdim ediblər.

ATƏT sədrinin çıxışı ilə yalnız axşam, şəxsən onun özündən çıxış mətnini xahiş etdikdən sonra tanış olmaq mümkün olub.

Beləliklə, ATƏT sədri qeyd edib ki, Avropada təhlükəsizlik konsepsiyası onun sədrliyinin prioriteti olaraq qalır. Gündəlikdə həmçinin qadınların problemləri və xüsusən BMT Təhlükəsizlik Şurasının 1325 saylı qətnaməsi, habelə regional təhdidlərin öhdəsindən gəlinməsində qadınların rolunun artırılması da var.

Azərbaycan xarici işlər naziri ilə görüşünün yekunlarına toxunan Linde qeyd edib ki, regionda 10 noyabr 2020-ci il tarixli bəyanatın imzalanmasından sonra dəyişən vəziyyət diqqət mərkəzində olub.

Saxlanılan şəxslər haqqında məsələ də daxil olmaqla, bəyanatın bəndlərinin yerinə yetirilməsi, habelə humanitar hüquqa hörmət irəliləmək üçün əsas yaradacaq, deyə Linde qeyd edib. O, həmçinin etimad tədbirlərinin və beynəlxalq oyunçuların regionda iştirakının əhəmiyyətini vurğulayıb.

“Mən ATƏT-in Minsk Qrupunun həmsədrlərinin və şəxsi nümayəndəmin sabit sülh axtarışı üzrə işini tamamilə dəstəkləyirəm. Bir sıra mühüm məsələləri həll etmək qalır. ATƏT və beynəlxalq ictimaiyyət bütünlükdə həllərin axtarışında mühüm rol oynamalıdır”, deyə o qeyd edib. -02D-