“Möhkəmlənmiş avtokratiya”, İnam Kərimovun azad media iddiası, “Tərtər işi” məhkəməsi – Rüfət Səfərov Çətin sualda

Bakı/25.05.23/Turan: "Freedom House" beynəlxalq insan hüquqları təşkilatı mayın 24-də növbəti "Keçid ölkələri 2023" hesabatını açıqlayıb. Hesabatda deyilir ki, ardıcıl olaraq 19-cu ildir ki, demokratik idarəetmə Mərkəzi Avropadan Mərkəzi Asiyaya qədər uzanan regionda ümumi tənəzzülə uğrayıb.

Hesabatda deyilir ki, 29 ölkədən 11-də demokratiya göstəriciləri azalıb, yeddi ölkədə irəliləyiş qeydə alınıb.

"Freedom House" təşkilatının hesabatında qeyd edilir ki, Azərbaycan reytinqdə yalnız Türkmənistan və Tacikistandan önə çıxa bilib.Onların daxil olduğu səkkiz ölkə möhkəmlənmiş avtoritar rejimlər adlandırılıb. "Freedom House" əvvəlki illərdə də Azərbaycanı "möhkəmlənmiş avtokratik rejim" adlandırıb.

Türkmənistan və Azərbaycanın dövlət qurumları demokratik keyfiyyətlərdən, demək olar ki, məhrumdur, deyə hesabatda vurğulanır. "Freedom House" Türkmənistanla Azərbaycan arasında daha bir müqayisə aparır, hər iki ölkədə vətəndaşların hakim elitanın qohumbazlığından əziyyət çəkdiyini qeyd edir.

Ermənistan və Gürcüstan, eləcə də Ukrayna və Moldova hibrid rejimlər sayılıb.

Azərbaycan hakimiyyəti bu hesabata, hələlik, münasibət açıqlamayıb. Ancaq indiyədək hakimiyyət təmsilçiləri ölkədə bütün təməl hüquq və azadlıqların qorunduğunu bildiriblər, oxşar tənqidləri rədd ediblər. Prezident Əliyev illər öncə "Freedom House" təşkilatını ermənipərəst mövqedə ittiham edib, bu qurumun hesabatlarının Azərbaycan üçün "heç bir əsası olmadığını" deyib.

Bu və gündəmdə olan digər məsələlər barədə hüquq müdafiəçisi Rüfət Səfərov Kamran Mahmudovun təqdimatında yayımlanan “Çətin sual” verilişində danışır.