Monopoliya taksi şirkətlərinə də çatdı? – Natiq Cəfərli Çətin sualda

Bakı/02.06.23/Turan: Rəqəmsal inkişaf və nəqliyyat naziri Rəşad Nəbiyev "APA-Economics"-ə müsahibə verib. Müsahibədə nazir ancaq taksi bazarı haqqında danışıb. Rəşad Nəbiyev deyib ki, Bakı şəhərində hər min nəfərə düşən taksi sayı oxşar şəhərlərlə müqayisədə 4-5 dəfə çoxdur. Nazir qlobal şirkətlərin Azərbaycandakı fəaliyyətinə də toxunub.

“Hesab edirəm, bu sahədə qlobal aqreqator şirkətlər, o cümlədən “Bolt”, “Uber”, “Yango” kimi şirkətlər də problemin böyüməsində mühüm rol oynadı. Bu şirkətlər hələ də qanunvericilikdə olan boşluqlardan istifadə edərək istər sərnişinlərin, istərsə də sürücülərin narazılığına səbəb olan neqativ halların yaranmasına bilavasitə yol açır.”

Rəqəmsal inkişaf və nəqliyyat naziri Rəşad Nəbiyevin qəflətən taksi bazarı haqda danışması çox güman ki, təsadüfi deyil. Bir qədər əvvəl Azərbaycanda yeni taksi şirkəti, özü də məhz qlobal şirkətlərdən biri fəaliyyətə başlamağa başladı. Məhz bu şirkəti Azərbaycana Paşa Holdinq gətirdi. İndi insanlar haqlı olaraq sual edirlər ki, niyə nazirin dilə gətirdiyi məsələlər "Paşa Holdinq" taksi biznesinə daxil olandan sonra yada düşür? Niyə məhz "Uklon" bazara girən kimi o biri qlobal taksi şirkətləri nazir səviyyəsində pislənməyə başlandı?

Bütün bunlarla bağlı iqtisadçı Natiq Cəfərli Kamran Mahmudovun təqdimatında yayımlanan “Çətin sual” verilişində danışır.