Müdafiə Nazirliyindəki həbslərin səbəbi nədir? – Cəsür Sümərinli “Çətin sual" qarşısında

Bakı/14.02.22/Turan: Dövlət Təhlükəsizliyi Xidmətinin (DTX) Müdafiə Nazirliyində əməliyyat keçirdiyi bildirilir. Media orqanlarında yayılan məlumata görə, əməliyyat nəticəsində bir sıra vəzifəli şəxslər həbs olunub.  Saxlanılanlar arasında Müdafiə Nazirliyinin Maliyyə İdarəsinin rəisi, polkovnik Rəfael Xəlilov, Quru Qoşunlarının maliyyə şöbəsinin rəisi Bayram Bayramov, “N” saylı hərbi hissənin maliyyə şöbəsinin rəisi Fərahim Sərkərov və nazirliyin zabiti Vüsal Əlizadənin olduğu bildirilir.

Məlumata görə, onlar haqqında DTX-nın İstintaq Baş İdarəsində cinayət işi başlanıb. Adları çəkilən şəxslərə qarşı Cinayət Məcəlləsinin 179.4 (xüsusilə külli miqdarda mənimsəmə və ya israf etmə), 341 (vəzifə səlahiyyətlərindən sui-istifadə və ya vəzifə səlahiyyətlərini aşma) və başqa maddələrilə ittihamlar irəli sürülüb. Bakı Hərbi Məhkəməsinin qərarıyla Rəfael Xəlilov, Bayram Bayramov, Fərahim Sərkərov və Vüsal Əlizadənin hər biri barəsində ilkin istintaq dövrü üçün 4 aylıq həbs qətimkan tədbiri seçilib.

Cinayət işində milyonlarla büdcə vəsaitinin yeyintisindən söhbət gedir.

Dövlət Təhlükəsizliyi Xidməti əməliyyatla bağlı məlumat yaymayıb.

“Xəzər” Hərbi Tədqiqatlar İnstitutunun rəhbəri Cəsur Sümərinli həbslərlə bağlı ehtimallarını Kamran Mahmudovun təqdimatında yayımlanan “Çətin sual” verilişində danışır.