`Persona-non-grata` elan olunan İran diplomatları və “casus ovu”. – Zərdüşt Əlizadə Çətin sualda

Bakı/07.04.23/Turan:  İranın Azərbaycandakı fövqəladə və səlahiyyətli səfiri Seyid Abbas Musəvi aprelin 6-da AR Xarici İşlər Nazirliyinə çağırılıb.Görüş zamanı İran səfirinə son zamanlar ölkəsi tərəfindən Azərbaycana münasibətdə nümayiş etdirilən təxribat xarakterli fəaliyyətə görə qəti narazılıq bildirilib, bu barədə Azərbaycan XİN-in mətbuat xidmətinin məlumatında deyilir.

İran Səfirliyinin 4 əməkdaşının diplomatik statusa uyğun olmayan və Diplomatik Əlaqələr haqqında 1961-ci il Vyana Konvensiyası ilə ziddiyyət təşkil edən fəaliyyətinə görə Azərbaycan hökuməti tərəfindən “persona-non-grata” (arzuolunmaz şəxs) elan edildiyi İran səfirinin diqqətinə çatdırılıb və həmin şəxslərin 48 saat ərzində Azərbaycan ərazisini tərk etməsi tələb edilib.

Artıq həmin diplomatların Azərbaycandan çıxması prosesinə başlanılıb. Bu barədə aprelin 7-də Azərbaycan Xarici İşlər Nazirliyinin mətbuat xidmətinin məlumatında deyilir.Ölkədən çıxarılan diplomatların vəzifəsi açıqlanmır. Onların adları: Mirmahdi Mirsalampur Şərif, Qurbanəli Purmərcan Varcovi, Hadı Moğadam,  Əsgər Bahari Xoş Mənzər.

Bu arada Azərbaycanda inanclı şəxslərin həbsləri davam edir. “Casus ovu” kimi sosial mediada adlandırılan bu prosesdə saxlanılanlar İrana işləməkdə günahlandırılır.

Siyasi şərhçi Zərdüşt Əlizadə Kamran Mahmudovun təqdimatında yayımlanan “Çətin sual” verilişində bu barədə danışır.