Qubad İbadoğlu niyə həbs edildi? – müavini Ellada Məmmədli Çətin sualda

Bakı/24.07.23/Turan: Ötən gün Azərbaycan Demokratiya və Rifah Partiyasının sədri Qubad İbadoğlu saxlanılıb. DİN-in mətbuat xidmətindən bildirildi ki, Azərbaycan Demokratiya və Rifah Partiyasının sədri Qubad İbadoğlu daxil olmuş müraciətlə əlaqədar vəkili Zibeydə Sadıqova ilə birgə DİN-in Baş Mütəşəkkil Cinayətkarlıqla Mübarizə İdarəsinə dəvət edilib.

Daha sonra Daxili İşlər Nazirliyindən bildiriblər ki, Qubad İbadoğlu  FETÖ ilə əlaqədə şübhəli bilinir.

«Azərbaycan Respublikası Daxili İşlər Nazirliyi Türkiyə Respublikasının Daxili İşlər Nazirliyindən daxil olan məlumat əsasında ölkəmizdə FETÖ ilə əlaqəli olan şəxslərə qarşı əməliyyat tədbirləri keçirmişdir. Tədbirlərlə saxlanılan 5 nəfərdən biri Q.İbadoğlu ilə əlaqəsinin olması barədə ifadə vermişdir. Həmin ifadə əsasında Q.İbadoğlunun ofisində axtarış aparılmış, iş üzrə zəruri əhəmiyyət kəsb edən sənədlər aşkarlanmış və Q.İbadoğlu saxlanılmışdır. Hazırda tədbirlər davam etdirilir», - nazirlikdən deyiblər.

İbadoğlunun ofisində axtarış aparılıb. Qubad İbadoğlunun qızı Jalə Bayramova bildirib ki, «ofisin içindən güya 40 min dollar pul çıxarıblar». «Onun saxta və ya gerçək olduğu bilinmir. Təbii ki polislər pulu özləri yerləşdiriblər.”

Qubad İbadoğlunu Cinayət Məcəlləsinin 204.1-ci maddəsi (Saxta pul və ya qiymətli kağızlar hazırlama, əldə etmə və ya satma, beş ildən yeddi ilədək müddətə azadlıqdan məhrum etmə ilə cəzalandırılır) ilə şübhəli şəxs qismində saxlanılıb.

Qubad İbadoğlu hansısa Anar Əliyevin şikayəti əsasında saxlanılıb. Əliyev siyasətçinin "ona dollar verdiyini" bildirib. Bu barədə jurnalistlərə vəkil Zibeydə Sadıqova məlumat verib. İbadoğlu bu iddiaları rədd edir. "O, deyib ki, Anar Əliyev kimi adamı, ümumiyyətlə, tanımır ", - vəkil qeyd edib.

Baş verənlərlə bağlı ADR partiyasının İH-nin üzvü Ellada Məmmədli Kamran Mahmudovun təqdimatında yayımlanan “Çətin sual” verilişində danışır.