Ramiz Mehdiyev qurduğu sistemə qarşı çıxır? – Samirə Qasımlı “Çətin sual" qarşısında

Bakı/11.02.22/Turan: Azərbaycan Milli Elmlər Akademiyasının prezidenti, bundan öncə uzun illər Prezident Administrasiyasının rəhbəri postunu tutmuş Ramiz Mehdiyev uzun sükutdan sonra onun istefasını tələb edənlərə sərt cavab verib.

Mehdiyev onu tənqid edənləri “avtobus və ya cib müxalifəti” adlandırır, tənqidçi deputatlar Etibar Əliyev və Fəzail Ağamalını isə “saxta deputatlar” adlandıraraq Milli Məclisə keçirilən son seçkilərin qanuniliyini şübhə altına alır.

Akademiyanın özündəki tənqidçilərə qayıdaraq Mehdiyev onları məkrli, “dünən akademik Mehdiyevin kitabını hədiyyə almaq üçün növbəyə duran” ikiüzlülər, yaltaqlar adlandırır. O, Mehdiyevin ünvanına sonsuz yaltaqlıq nümunəsi kimi deputat Musa Qasımlının adını çəkir. Ayrı-ayrı abzaslarda keçmiş ictimai çıxışları və bioqrafik ekskursiyalar göstərilməklə Arxeologiya, Etnoqrafiya və Antropologiya İnstitutunun keçmiş direktor müavini Nəcəf Museyibli, AMEA Yüksək Texnologiyalar Parkının rəhbəri Vaqif Abbasov, Riyaziyyat və Mexanika İnstitutunun direktoru Misir Mərdanov tənqidlərə məruz qalıb.

AMEA-nın saytında dərc olunan geniş mətnin altında Mehdiyevin imzası olmasa da,  müəllifin Ramiz Mehdiyev olduğu ehtimal edilir.

Mehdiyev kimlərə barmaq silkələyir, kimi təhdid edir? Bu gün onun qurduğu sistemin oyunçuları Mehdiyevdən nə istəyir?

Siyasi psixoloq Samirə Qasımlı Kamran Mahmudovun təqdimatında yayımlanan “Çətin sual” verilişində bu və digər suallara cavab verir.