Rusiya sərhəddində NATO-nun genişlənməsi nə ilə nəticələnə bilər? – Elman Fəttah “Çətin sual” qarşısında

Bakı/29.06.22/Turan: Nəhayət Türkiyə, İsveç və Finlandiya arasında Finlandiya və İsveçin NATO-ya üzvlük proseslərinə dair üçtərəfli memorandum dünən imzalandı. Qəbul edilən birgə bəyanatda Finlandiya və İsveç terror təşkilatlarının Türkiyəyə qarşı hücumlarını açıq və birmənalı pisləyiblər:

“Finlandiya və İsveç PKK-nın və bütün digər terror təşkilatlarının və əlaqəli şəxslərin fəaliyyətinin qarşısını almağı öhdəsinə götürür. Türkiyə, Finlandiya və İsveç terror təşkilatlarının fəaliyyətinin qarşısını almaq üçün əməkdaşlığı artırmaq qərarına gəlib”.

Bəyanatda qeyd olunur ki, Finlandiya və İsveç PKK və onun bütün qollarının pul toplama və işə götürmə fəaliyyətlərini qadağan edəcək:

“İsveç və Finlandiya Türkiyəyə qarşı müdafiə sənayesi sahəsində embarqo məhdudiyyətlərinin qaldıraraq əməkdaşlığı artıracaq”.

O cümlədən, gələcəkdə NATO müttəfiqləri olan Finlandiya və İsveç Türkiyədə PYD/YPG və FETÖ olaraq təyin olunan təşkilatlara dəstək verməyəcək:

“İsveç təsdiq edir ki, yeni və daha effektiv “Terror Cinayətləri Qanunu” iyulun 1-dən qüvvəyə minəcək”.

NATO-nun baş katibi Y.Stoltenberq də İsveç və Finlandiyanın NATO-ya üzv olmaq üçün Türkiyə ilə razılığa gəldiyini və Ankaranın narahatlığının aradan qaldırılacağını bildirib.

2022-ci il mayın 18-də Finlandiya və İsveç NATO-ya üzv olmaq üçün rəsmi müraciət etmişdi. Türkiyə isə İsveç və Finlandiyanın üzvlüyünə qarşı çıxırdı. Rəsmi Ankara iddia edirdi ki, hər iki Skandinaviya ölkəsi Türkiyənin terrorla mübarizəsinə dəstək vermir, əksinə PKK-nın Suriyadakı qanadı YPG-yə kömək edir. Ankara həm İsveç, həm də Finlandiyanın PKK üzvlərinə qucaq açdığını açıq şəkildə bəyan edirdi.

Beynəlxalq məsələlər üzrə ekspert Elman Fəttah Rusiya ilə sərhəddə NATO-nun genişlənməsinin nələrə səbəb ola biləcəyi haqda Kamran Mahmudovun təqdimatında yayımlanan “Çətin sual” verilişində danışır.

Youtube səhifəsinin ünvanı:

https://www.youtube.com/c/TuranAgentliyi

Facebook səhifəsinin ünvanı:

https://www.fb.com/turanagency