“Tərtər işi” nə görə qərarları ləğv edilən hakimlər niyə cəzalandırılmır? – Rəsul Cəfərov Çətin sual qarşısında

Bakı/11.11.22/Turan: Noyabrın 10-da Gəncə Hərbi Məhkəməsində "Tərtər işi" üzrə təqsirləndirilən 8 nəfərin - Natiq Quluzadə, Nicat Rzayev, Zaur Abdullayev, Vəli Xəlilov, Emin Aibov, Yalçın Tarverdizadə, Orxan Babayev və Emil Əliyevin cinayət işi prokurorluğa qaytarılıb. Gəncə Hərbi Məhkəməsinin hakimi Vüqar Məmmədovun sədrliyi ilə keçirilən prosesdə iş üzrə icraata xitam verilməsi barədə qərar çıxarılıb.

Məhkəmənin qərarına əsasən, cinayət işi ibtidai istintaqa prosesual nəzarəti həyata keçirən prokurorluğa qaytarılıb.

Qeyd edək ki, Ali Məhkəmənin Plenumu "Tərtər işi" ilə bağlı 18 nəfər barəsində kassasiya qərarını ləğv edib və baxılması üçün apellyasiya instansiyası məhkəməsinə göndərilib .Bu ayın əvvəli Gəncə Apellyasiya Məhkəməsi daha 11 nəfərin hökmünü ləğv edərək birinci instansiya məhkəməsinə göndərmişdi. Ali Məhkəmənin Plenumu isə sentyabrın 30-da Tərtər hadisələrində dövlətə xəyanət və başqa ağır maddələrlə məhkum edilən şəxslərdən 19 nəfərin haqqındakı apellyasiya və Ali Məhkəmənin qərarlarını ləğv etmişdi.

Belə olduğu halda bir sual ortaya çıxır: Bu insanların işinin istintaqını aparanlar, hökm vermiş və yuxarı instansiya məhkəmələrində həmin hökmü qüvvədə saxlamış hakimlər niyə cəzalandırılmır?

Hüquq müdafiəçisi, Bakı İnsan Hüquqları Klubunun rəhbəri Rəsul Cəfərov Kamran Mahmudovun təqdimatında yayımlanan “Çətin sual” verilişində bu barədə danışır.