Türkiyədə terror aktları Ankaraya təzyiq göstərmək məqsədi daşıyır - ekspert

Son vaxtlar Türkiyədə bir sıra terror aktları və ölkəyə hücumlar onun geosiyasi vəziyyəti və ölkə ətrafında gedən proseslərlə bağlıdır. Bu, Suriya hadisələrinə, İŞİD-in, habelə PKK-nin fəaliyyətinə aiddir. Bundan başqa, terror aktları Ankaranın bəzi dövlətlərlə münasibətlərinin gərginləşdirilməsi ilə birbaşa əlaqəlidir. Bu fikri Turan agentliyinin “Çətin Sual” rubrikasına müsahibəsində Təhlükəsizlik problemlərinin araşdırılması Mərkəzinin rəhbəri, Azərbaycan Milli Təhlükəsizlik Nazirliyinin keçmiş podpolkovniki İlham İsmayıl İstanbulun “Atatürk” hava limanında dünən baş vermiş terror aktını şərh edərkən bildirib.

Sonuncu terror aktı Ankaraya təzyiq siyasətinin tərkib hissəsidir. Kemçiş əks-kəşfiyyatçının fikrincə, terror aktının sifarişçiləri siyasi vəziyyətdən fərasətlə istifadə edirlər – bu terror aktını eyni zamanda bir neçə qüvvəyə - İŞİD, PKK, Türkiyə daxilindəki radikal islamçılara aid etmək olar.

Ekspert terror aktının Türkiyənin İsrail və Rusiya ilə münasibətlərinin normallaşması ilə bağlı olduğunu da istisna etmir.

“Bu, münasibətləri normallaşdırmağın Türkiyəni xilas etməyəcəyinin və onun zəif olaraq qalacağının mesajıdır”, deyən İsmayıl hələlik heç kimi bu terror aktına görə məsuliyyəti üzərinə götürmədiyini qeyd edib.

Terrora qarşı mübarizə üçün qlobal səylər kifayətdirmi? Bu suala İsmayıl inkar cavabı verib. Bu səylər kifayət deyil. “Dünya oyunçularının real qarşılıqlı fəaliyyəti olsaydı İŞİD-ə kifayət qədər tez bir zamanda son qoymaq olardı. Amma dünya siyasətinin aparıcı oyunçularının müxtəlif maraqları terrora qarşı qlobal mübarizə aparmağa imkan vermir və ya bu mübarizəni səmərəsiz edir”, İsmayıl belə hesab edir.

Onun fikrincə, Türkiyənin cavab tədbirləri amansız olacaq, çünki söhbət Türkiyənin onsuz da kifayət qədər zərər görmüş milli təhlükəsizliyindən gedir.

PKK-lı kürd terrorçularına qarşı mübarizəyə gəlincə, İsmayıl hesab edir ki, döyüşçülərə qarşı hərbi əməliyyatlarla yanaşı sağlam düşüncəli kürd siyasətçiləri ilə maarifləndirmə işini də gücləndirmək və onları terrorizmə qarşı mübarizədə müttəfiqə çevirmək lazımdır.

Azərbaycandakı vəziyyətə gəlincə, ölkədə terror tərəfdarları tək-tükdür və onların əksəriyyəti Yaxın Şərqə gedib.

Bununla belə, xüsusi xidmətlər ayıq-sayıqlığı əldən verməməli və ölkədə radikalizmin yayılmasının və mümkün terror aktlarının qarşısının alınması üçün müvafiq işlər görməlidir, deyə podpolkovnik qeyd edib. -06D-