Xankəndidə Azərbaycan bayrağı nə vaxt dalğalanacaq? – İlham İsmayıl Çətin sualda

Bakı/29.09.23/Turan: Sosial şəbəkələrdə Azərbaycan DİN-in post-patrul maşınlarının Xankəndi küçələrində növbə çəkdiyini əks etdirən görüntülər yayılıb.

Bu arada, erməni mənbələri sentyabrın 29-u səhər saatlarına olan məlumata görə, 85 min nəfərin Qarabağı tərk etdiyini bildiriblər. Ən çox əhali Xankəndinin özündə qalıb.

Xocavənd (Martuni) və Ağdərə (Mardakert), demək olar ki, tamamilə boşalıb.

 Bu arada Google internet resursu Azərbaycan xəritəsini redaktə edərək, Qarabağ İqtisadi Rayonunun ərazisindəki bütün erməni adlarını silib.

Buna qədər Google toponimlərin həm erməni, həm də Azərbaycan variantlarını birlikdə göstərirdi. Azərbaycanlı istifadəçilərin və ictimai təşkilatların çoxsaylı etirazlarına baxmayaraq, Google-da yaşayış məntəqələrinin ikili adları qalırdı. İndi toponimlər Azərbaycan Respublikasının Konstitusiyasına uyğun olaraq, yalnız Azərbaycan variantında verilib.

Azərbaycan ordusunun həyata keçirdiyi lokal antiterror əməliyyatı nəticəsində Qarabağda separatçı rejim buraxıldığını elan etdi. Bəs Xankəndidə Azərbaycan bayrağı nə vaxt dalğalanacaq?

Siyasi şərhçi İlham İsmayıl Kamran Mahmudovun təqdimatında yayımlanan “Çətin sual” verilişində bu barədə danışır.