ABŞ İran pilotsuz təyyarələrinin alınmasında Rusiyaya kömək edənlərə sanksiyalar tətbiq edib

Vaşinqton/16.11.22/Turan: Çərşənbə axşamı Bayden administrasiyası İran pilotsuz təyyarələrinin  istehsalı və Rusiyaya göndərilməsinə bağlı olan təşkilatlara qarşı əlavə sanksiyaları açıqlayıb, Turan-ın Vaşinqton müxbiri bildirib.

Dövlət katibi Entoni Blinken sanksiyaları açıqlayarkən deyib ki, Moskva “mülki infrastruktura və şəhərlərə zərbələr  endirmək” üçün İranın pilotsuz uçuş aparatlarından istifadə edir.

Son sanksiyalar aviasiya ilə əlaqəli bir neçə şirkətə və iki nəfərə -Abbas Cuma və Tiqran Xristoforoviç Srabionova qarşı yönəlib. Onlar “Vaqner Qrupu”ndan rusiyalı muzdluların “İrandan pilotsuz təyyarələr almasına” şərait yaradıblar.

Sanksiyalar həmçinin İran İslam İnqilabı Keşikçiləri Korpusunun  aerokosmik qüvvələrinə, Qods Aviation Industries şirkətinə və Shahed Aviation Industries Elmi-Tədqiqat Mərkəzinə təsir edib.

“ABŞ yerləşdiyi yerdən asılı olmayaraq Rusiyanın Ukraynaya işğalını dəstəkləyən adamlara və şirkətlərə sanksiyalar tətbiq etməkdə tamamilə əzmlidir”, –maliyyə naziri Janet Yellen bildirib.

İran İslam İnqilabı Keşikçiləri Korpusunun aerokosmik qüvvələri Rusiyaya pilotsuz təyyarələr göndəriblər, Qods, Mohajer-6 və Shahed Aviation şirkətləri isə onları istehsal edirlər. Ukraynada vurulan bu pilotsuz təyyarələrin qalıqları Ukraynada sənədləşdirilib, Blinken öz bəyanatında bildirib.

Noyabrın əvvəlində İran rəsmi şəxsləri etiraf ediblər ki, pilotsuz təyyarələri Moskvaya Ukraynada müharibə başlamadan əvvəl veriblər. 0