Armen Abazyan yenidən Ermənistan Milli Təhlükəsizlik Xidmətinin direktoru təyin edilib

Baş nazir Nikol Paşinyanın rəsmi hökumət portalında dərc olunan qərarına əsasən, Armen Abazyan yenidən Ermənistan Milli Təhlükəsizlik Xidmətinin direktoru vəzifəsinə təyin edilib. Bu qərar Abazyan ilkin olaraq baş nazirin təqdimatı əsasında prezidentin fərmanı ilə vəzifəsindən azad edildikdən sonra verilib.

Kadr dəyişiklikləri 2015-ci ildə konstitusiya tələblərinə uyğunlaşdırılan “Milli təhlükəsizlik orqanlarında xidmət haqqında” qanuna edilən son dəyişikliklərin nəticəsidir. Bu dəyişikliklərə əsasən, Milli Təhlükəsizlik Xidmətinin rəhbərinin təyinatı indi prezidentin deyil, baş nazirin müstəsna səlahiyyətində olacaq.

Armen Abazyan 2020-ci il noyabrın 8-də ovaxtkı prezident Armen Sarkisyanın fərmanına əsasən, Milli Təhlükəsizlik Xidmətinin direktoru vəzifəsinin icrasına başlayıb. Maraqlıdır ki, Abazyan bundan əvvəl 2020-ci il avqustun 12-dən xüsusi xidmət rəisinin müavini vəzifəsində çalışıb.