Azərbaycanlılar Çexiya sahillərində: Həmyerlilərimizin Çexiyadakı biznesi haqqında 

Bakı/02.07.21/Turan: Çexiyanın cənub bölgəsi Azərbaycanlı investorların xoşuna gəlib. Onlar orada torpaq sahəsi alıblar, həmçinin möhtəşəm tikililər planlaşdırıblar, amma nədənsə planları və onların həyata keçirilməsi arasında neytral bir zolaqda ilişib qalıblar. Bu barədə Çexiyanın investigace.cz nəşri öz araşdırmasında yazır.

(https://www.investigace.cz/azerbajdzanci-u-ceskeho-more-jednou-jako-byznys-podruhe-jako-vstupenka/)

Çexiya Respublikasında şirkət və ya daşınmaz əmlaka malik olmaq çirkli pulları yumağa və ya asanlıqla Şengen zonasına düşməyə imkan verən strateji məqsəddir. Cənubi Çexiyaya vəsait axınının arxasında kim dayanır və bu şirkətlər kimə məxsusdur?

Demək olar ki, hamısı eyni ünvanda qeydiyyatda olan Çexiyalı və Azərbaycanlı sahibləri olan çoxsaylı şirkətlərdə Azərbaycan hökuməti ilə əlaqəsi olan insanları, eyni zamanda, heç kimin tanımadığı insanları tapmaq olar.

Çexiyada Azərbaycan biznesinin tarixi 2000-ci ildə başlayıb. AKAR-CB s.r.o. Rüfət İmamverdiyev tərəfindən Çeska-Budeevitsada qeydiyyatdan keçirilib. Şirkət Kodetkada yerləşirdi, sonradan burada tikinti üçün torpaq sahəsi alıb.

Rüfət İmamverdiyev Azərbaycan Beynəlxalq Bankının London şöbəsinin keçmiş rəhbəridir. O, həmçinin LECO-CB s.r.o. şirkətinin idarəçi direktorudur, hazırda bu şirkətin fəaliyyəti Britaniyanın maliyyə hakimiyyəti tərəfindən araşdırılır.

Kodetkada yuxarıda qeyd edilən torpaq sahəsinin yanında başqa bir baxımsız torpaq sahəsi digər bir Azərbaycan şirkətinə - ALPS s.r.o.-ya məxsusdur. O da Lipno səddində otel tikməyi planlaşdırır. Bu şirkət Londonda yaşayan, atası bu yaxınlara qədər Azərbaycanın hakim elitasının üzvü olan azərbaycanlıya məxsusdur.

Bu iki şirkətin ortaq tərəfi var - onlarda müəmmalı Elçin Kazımov iştirak edir.

2008-ci ilin əvvəllərində Çeska-Budeevitsada daha üç Azərbaycan şirkəti qeydiyyatdan keçib, hər üç şirkətin idarəçiləri eyni idi - Miroşniçenko ailəsi.

İqor, Yuri və Viktoriya Miroşniçenko həmçinin Kodetkada yerləşən KİBUL s.r.o. şirkətinin xoşbəxt sahibləridir.

LECO-SB s.r.o. Londonda yaşayan azərbaycanlı Zamirə Hacıyevaya və onun qızı Leylaya məxsusdur. Zamirə mənimsəməyə görə 15 il müddətinə azadlıqdan məhrum edilmiş Beynəlxalq Bankın keçmiş sədriCahangir Hacıyevin həyat yoldaşıdır. Hökmə əsasən, o, bankın pullarını xaricə çıxarırdı.

Azərbaycan Maliyyə Nazirliyinin rəsmi bəyanatında deyilir ki, "bank 2009-cu ildən 2015-ci ilə qədər qanunsuz borclar verib" və Hacıyev ölkədən 6,3 milyard dollardan çox vəsait çıxarıb. Bu vəsait anonim şirkətlərin ofşor hesablarında gizlədilib.

Hacıyev 2016-cı ildə həbs edilib. Onun həyat yoldaşı Zamirənin təmtəraqa olan həvəsi vəziyyəti daha da çətinləşdirib. O, böyük vəsait xərcləyir, Beynəlxalq Bankın kredit kartları ilə ödəniş edirdi. 2018-ci ildə Hacıyevadan onun və həyat yoldaşının sərvətinin mənbəyini açıqlamağı xahiş ediblər. O, bunu edə bilməyib və Britaniya hökuməti onun aktivlərini dondurub.

 ABB-dən pulların yoxa çıxması haqqında yeni heç bir məlumat yoxdur, bu barədə OCCRP-nin "Azərbaycan paltaryuyanı" layihəsində danışılıb.

Çexiyadakı LECO-CB-nin məqsədinin nə olduğu məlum deyil. Elçin Kazımov, eyni binada yerləşən başqa bir Azərbaycan şirkətinin idarəçi direktoru iddia edir ki, Hacıyevanı tanımır və onun şirkəti haqqında heç nə bilmir. Təkcə 2014-cü ilə qədər dərc edilmiş hesabatlara əsaslanaraq, şirkətin fəaliyyət göstərmədiyi, deməli, heç bir gəlir gətirmədiyi barədə nəticə çıxara bilərik. LECO-CB-nin idarəçi direktorunun 6 il əvvəl vəfat etmiş Rüfət İmamverdiyev olması da bunu göstərir. 

Yoxdan ortaya çıxan və heç bir biznes yaratmayan şirkətlər üçün açıqlamardan biri onların öz sahibləri üçün Şengen zonasına çıxış verməsidir. Şirkət sahibi daimi sakin statusu alır və Avropada sərbəst şəkildə səyahət edə bilər.

LECO-CB ilə yanaşı, Rüfət İmamverdiyev Çeska-Budeevitsada yerləşən bir neçə digər şirkətin idarəçi direktoru və ya tərəfdaşı olub. Amma onun əsas məşğuliyyəti 13 il ərzində - 2015-ci ilin aprelinə qədər Beynəlxalq Bankın London şöbəsinə rəhbərlik etmək idi.

Daha bir Azərbaycan şirkəti - ALPS s.r.o. torpaq sahələrinə malikdir, amma onun sahibi - Cümə Əhmədzadə Azərbaycanın keçmiş Meliorasiya nazirinin oğludur. Bundan əvvəl Cümə Londonda təmtəraqlı mənzil almışdı.

Cümə Əhmədzadənin həyat yoldaşı Günel Rüstəmova Azərbaycan Mərkəzi Bankının sədri Elman Rüstəmovun qızıdır. Bu cütlük naməlum mənbələrdən gələn sərvətləri ilə ictimaiyyətin diqqətini çəkib. Cütlüyün məşğul olduğu biznes gəlirli sahə deyil.

Əvvəlcə ALPS-nin idarəçisi adı çəkilən Yuri Miroşniçenko idi. 2014-cü ildə Günel Rüstəmova şirkəti tərk edib və direktor vəzifəsini özünü Əhmədzadənin dostu adlandıran Elçin Kazımov tutub.

ALPS Müdafiə Nazirliyindən Lipnen su anbarının səddində köhnə ordu sanatoriyasının binasını alıb. Bu bina üçün Azərbaycanlı investorlar 26,1 milyard çex kronu ödəyib. Əvvəlcə obyektdə yenidənqurma işləri həyata keçirilməsi planlaşdırılırdı.

2018-ci ilin yayında ağır texnika gəlib və köhnə binanı söküb. Yalnız beton bünövrə, çınqıl qalıqları və təmizləyici qurğular qalıb. Şüşədən gəmi və ağac şəklində planlaşdırılan böyük otel hələlik kağız üzərində qalır.

"Biz düşünürdük ki, hər şey Azərbaycanda olduğu kimi rahat olacaq. Tikintiyə icazə almaq üçün ərizə verəcəyik və otel iki il sonra hazır olacaq", deyə ALPS-nin direktoru Elçin Kazımov bildirir. "Biz 6 il icazə gözlədik!".

Kazımov ortaya çıxana qədər ALPS-nin daha bir yatan şirkət olduğu düşünülürdü və onun mühasibat sənədlərindəki məlumatlardan göründüyü qədər, onun 750 000 çex kronu borcu var idi. Amma 2014-cü ildə işlər yaxşılaşıb və hesablara gözlənilmədən 63 milyon çex kronu daxil olub.

Kazımov pulların haradan gəldiyini bilmədiyini iddia edir. Onun sözlərinə görə, dostu Əhmədzadədən soruşmaq yaxşı çıxmazdı. -02D-