Dünyanın üçüncü böyük Ticarət Palatasının sədrliyi uğrunda rəqabət qızışıb

Ankara/01.11.22/Turan: Turan İnformasiya Agentliyinin məlumatına görə, dünyanın üçüncü böyük Ticarət Palatası  olan 140  yaşlı İstanbul  Ticarət Palatasının sədrliyi  uğrunda mübarizədə namizədliyini irəli sürən Murat  Kalsın türk və əcnəbi jurnalistlər üçün keçirdiyi mətbuat konfransında planlarını açıqlayıb.

Ticarət Palatasının indiki rəhbərliyinin işlərin öhdəsindən gələ bilmədiyinə diqqəti cəlb edən Murat Kalsın pandemiyanın yaratdığı böhranlardan meydana çıxan enerji böhranına qarşı iqtisadiyyatın müqavimətini artırmaq üçün planlaşdırdıqları tədbirlərdən danışıb.

“İstanbul Ticarət Palatasının 700 min şirkət üzvü olduğu halda, üzvlərin sadəcə 8-10%-i səs verir. Seçkidə qalib gəlməyimiz halında hazırlayacağımız infrastrukturla növbəti seçkidə üzvlərin əksəriyyətinin internetdən səs verməsinə nail olacağıq. Təəssüf ki, bizə yaxınlıq göstərən şirkət sahiblərinə təzyiqlər edilir. Ancaq biz hər şeyin öhdəsindən gələrək seçkidə qalib gələcəyimizə inanırıq” deyə sözlərinə davam edən Murat Kalsın İTP üzvlərinin haqlarının müdafiəsi uğrunda əllərindən gələn hər şeyi edəcəklərini vurğulayıb.

Mətbuat konfransında Turan İnformasiya Agentliyinin Türkiyə müxbirinin “Keçmiş sovet ölkələrində Ticarət palatalarının vəzifələri hələ də sərgilər təşkil etməklə məhdudlaşır, digər QHT-lər kimi bu sahənin inkişafına da hökumətlər icazə vermir. Türkiyənin bu sahədəki təcrübəsini o bölgələrlə bölüşəcəksinizmi?” sualına Murat Kalsın bu sözlərlə cavab verib: “İstanbul Ticarət Palatasının bu istiqamətdəki təşəbbüsləri təəssüf ki, yarımçıq qaldı. Bizim üçün ən önəmli işlərin başında təkcə keçmiş sovet ölkələrilə deyil, ərəb ölkələrilə də bu sahədə əlaqələri gücləndirmək olacaq. Bununla bağlı konkret plan  və proqramlarımız hazırdır. Seçkidən qalib çıxan o planları həyata keçirməyə başlayacağıq”.

İstanbul Ticarət Palatasına daxil olan 81 komissiyanın sədrliyinə seçkilər noyabrın 9-da keçiriləcək. Növbəti  həftədə isə komissiya sədrləri öz aralarından İTP-nin yeni İdarə Heyətini və sədrini seçəcəklər.—0—

Murat  Kalsın türk və əcnəbi jurnalistlər üçün keçirdiyi mətbuat konfransında planlarını açıqlayıb. Turan