Ərdoğan hərbi çevriliş cəhdinə görə həbs edilən zabitlərin işinə yenidən baxılmasını istəyir

 Türkiyənin baş naziri Rəcəb Tayyib Ərdoğan bəyan edib ki, 2003-cü ildə hökuməti devirməyə çalışdığı üçün həbs edilən bir neçə yüz zabitin işinə yenidən baxılmasını istəyir, deyə  RBC BBC-yə istinadən bildirir. Onlara hərbi çevriliş cəhdinə görə ittiham 2012-ci ildə elan edilib. Təqsirləndirilənlər məhkəmədə ittihamı rədd edərək, bunun adi hərbi təlim olduğunu bildiriblər. 

Turan agentliyi qeyd edir ki, 2008-2010-cu illərdə Türkiyənin Baş Qərargah rəisi olmuş və ömürlük həbs cəzası almış İlkər Başbuğ  nəşrə hazır kitabında bildirir ki, onlara qarşı irəli sürülən qeyri-leqal silahlı qüvvələr yaradılması ittihamı Türkiyə ordusu və zabitləri üçün təhqirdir. Bu ittihamları təhqir sayan bir sıra zabitlər tabel silahı ilə özünü vurub. Bu, siyasi rəhbərliyinin hərəkətinə qarşı etiraz idi, deyə Başbuğ qeyd edir.    

Əvvəllər türk hərbçilər bir neçə cinayət işi üzrə apellyasiya şikayəti veriblər. "Əgər iddialar qəbul edilsə, təkrar istintaq labüddür", - deyə “Ergenekon” işi üzrə vəkillərdən Haluk Peksen bildirib. Bu iş üzrə 300-ə qədər zabit sui-qəsd hazırlama cəhdinə görə uzunmüddətli cəza alıb. 

Apellyasiya korrupsiya qalmaqalı nəticəsində hökumətin nüfuzunun sarsıldığı vaxt verilib. Ərdoğan bildirir ki, qalmaqal onun hakimiyyətini zəiflətmək üçün xaricdə hazırlanan sui-qəsdin nəticəsidir. Əvvəllər Ərdoğanın müşaviri ehtimal sürüb ki, zabitləri saxta ittihamlarla həbs ediblər. 

Ekspertlərin fikrincə, hərbçilərin sui-qəsdi haqda iş Türkiyədə silahlı qüvvələrin siyasi proseslərə təsirini azaltmaq məqsədi güdüb. Müharibədən sonra Türkiyədə 3 hərbi çevriliş olub: 1960, 1971 və 1980-ci illərdə.—0—