MAQATE rəhbəri bildirib ki, Ukraynadakı Zaporojye AES-in soyuducu qülləsi yanğından sonra sökülməyə ehtiyac duyur

Reuters: BMT-nin Atom Enerjisi Agentliyinin rəhbəri bildirib ki, Ukraynada Rusiyanın işğalı altında olan Zaporojye atom elektrik stansiyasının soyuducu qülləsi keçən ay baş vermiş yanğın zamanı ciddi ziyan görüb və sökülməlidir.  

Beynəlxalq Atom Enerjisi Agentliyinin baş direktoru Rafael Qrossi bunu çərşənbə günü, Rusiyanın 2022-ci ilin fevralında Ukraynanı işğal etməsindən qısa müddət sonra rus qoşunları tərəfindən ələ keçirilən AES-ə beşinci səfəri zamanı deyib. Moskva və Kiyev müntəzəm olaraq bir-birini atom elektrik stansiyalarına hücumlarda və nüvə qəzası təhlükəsində ittiham edir.

Qrossi “X” sosial şəbəkə hesabında  soyutma qülləsinin içindən dəyən ziyanı qiymətləndirdiyi bir video yerləşdirib.

"Bu günə qədər qüllənin bu nöqtəsinə gəlib çata bilməmişdik, ona görə də zərəri daha yaxşı qiymətləndirə bilirik", dəbilqə və zirehli gödəkçə geyinmiş Qrossi videoda deyib.

“Bu böyük tikili gələcəkdə yararsız hala düşəcək, ona görə də nə vaxtsa söküləcək”.

Avqustun 11-də qüllədə yanğın baş verib, Rusiya və Ukrayna yanğına səbəb olan hərəkətlərə görə bir-birini günahlandırıb.

O zaman Qrossi hadisəni çoxsaylı "ehtiyatsız hücumlardan" biri kimi xarakterizə edib, lakin günahı kiminsə üzərinə atmaqdan çəkinib.

Ukraynanın cənub-şərqində yerləşən və altı reaktoru olan Avropanın ən böyük Zaporojye atom elektrik stansiyası “soyuq dayanma” rejimindədir və elektrik enerjisi istehsal etmir.

Nüvə materiallarını soyutmaq və qəzanın qarşısını almaq üçün kənardan cərəyan tələb olunur.

Videoda Qrossinin keçən il Ukraynanın cənubundakı Kaxovka bəndinin dağılmasından sonra azalan su təchizatını təmin edən nasos stansiyasını yoxladığı da görünür.

O, həmçinin nüvə yanacağı anbarına baş çəkib.

Qrossi çərşənbə axşamı Kiyevdə Ukrayna prezidenti Vladimir Zelenski ilə görüşüb və deyib ki, 2022-ci ilin ortalarından MAQATE müfəttişlərinin yerləşdiyi Zaporojyedə vəziyyət “çox kövrəkdir”.

Qrossi keçən həftə Rusiyanın cənubundakı Kursk nüvə stansiyasına baş çəkib və orada nüvə qəzası riskinin olduğunu deyib, çünki keçən ay Kursk vilayətinə daxil olan Ukrayna qoşunları ondan 40 km (25 mil) aralıda  yeləşir.