Rusiya Ukrayna şəhərlərinə kütləvi hücuma keçib

Kiyevdə bir neçə partlayış baş verib, şəhərdə hava hücumundan müdafiə sistemləri intensiv işləyirdi, Ukrayna paytaxtının meri Vitali Kliçko cümə günü, dekabrın 29-u səhər Telegram-da bildirib.

Partlayışlarla bağlı ilk məlumatlardan sonra Kliçko Kiyevin Podolsk rayonundakı anbarların yandığını bildirib. Daha sonra Kliçko Lukyanovskaya metrostansiyasının binasının partlayış nəticəsində zədələndiyini deyib. “Stansiya sığınacaq kimi fəaliyyət göstərir”, o əlavə edib.

Eyni zamanda, dövlətə məxsus “Rossiyskaya qazeta” yazıb ki, “Lukyanovskaya” metro stansiyasının ərazisində “Artyom” zavodu fəaliyyət göstərir, o, “hava-hava” tipli idarə olunan raketlər və digər hərbi avadanlıq istehsal edir.

KİV-in məlumatına görə, Kiyevdə ən azı iki partlayış dalğası olub.

Lvovda partlayışlar

Bir müddət sonra Lvov şəhərinin meri Andrey Sadovı Telegram-da şəhərdə yeni partlayış səsləri barədə yazıb. Həmin gün səhər o, Lvov vilayətinin ondan çox “Şahed” dronunun hücumuna məruz qaldığını bildirib. "Lvovda kritik infrastruktur obyektində yanğın var. Bu məsələdə təfərrüat yoxdur" deyə o qeyd edib.

Daha sonra Lvov vilayət hərbi admnistrasiyasının sədri Maksim Kozitski yazıb: "İlkin məlumatlara görə, Lvovda yaşayış binasında partlayış olub. Zərər çəkənlər var". Kozitski əlavə edib ki, yanğın şəhərin liseylərindən birində baş verib, ehtimal ki, ora raket qalıqları düşüb.

Xarkov və Odessada partlayışlar

Dekabrın 29-da bütün Ukraynada hava hücumu xəbərdarlığı elan edilib.

Bu günün səhər Xarkov meri İqor Terexov şəhərdə partlayışlar barədə bir neçə dəfə məlumat verib. Əvvəlcə o, Kiyev və Xolodnoqorsk rayonlarında baş verən partlayışlar barədə məlumat verib, bundan sonra şəhərdə elektrik enerjisi qismən kəsilib. Moskva vaxtı ilə təxminən 8.00-da Terexov yeni partlayışlar silsiləsi haqqında yazıb.

Merin sözlərinə görə, Rusiyanın Xarkova hücumu nəticəsində 1 nəfər ölüb, 8 nəfər yaralanıb.

Dekabrın 29-u səhər saatlarında Odessa və Çerkassı rəhbərliyi də partlayışlar barədə məlumat verib. Odessa hərbi administrasiyasının rəhbəri Oleq Kiperin sözlərinə görə, Odessada vurulan pilotsuz təyyarənin parçalarının düşməsindən sonra çoxmərtəbəli binada yanğın başlayıb.

Ukrayna mətbuatı da Dneprdə bir sıra partlayışlardan yazır. “Liga net”dən verilən ilkin məlumata görə, raket ticarət mərkəzinə düşüb.

Dekabrın 29-da həmçinin Xmelnitski və Sumı vilayətlərində, eləcə də Zaporojyenin Kiyevin nəzarətində olan hissəsində hava hücumu xəbərdarlığı elan edilib.

Zelenski Rusiyanın Ukrayna şəhərlərinə gecə hücumunun nəticələri haqqında

Dekabrın 29-na keçən gecə Rusiyanın Ukrayna şəhərlərinə raket hücumunun nəticələrini şərh edən Ukrayna prezidenti Vladimir Zelenski bildirib ki, Rusiya “arsenalında olan, demək olar ki, hər şeydən: “Kinjal”lardan, “S-300”lərdən, qanadlı raketlərdən, PUA-lardan” istifadə edib. "Strateji bombardmançı təyyarələr X-101/X-505 buraxıb. Təxminən 110 raket atılıb, onların əksəriyyəti vurulub", - Ukrayna lideri Telegram-da yazıb.

Onun sözlərinə görə, Rusiyanın Kiyev, Lvov, Odessa, Dnepr, Xarkov, Zaporojye və Ukraynanın digər şəhərlərinə hücumlar zamanı o cümlədən, “doğum evi, təhsil müəssisələri, ticarət mərkəzi, hündürmərtəbəli binalar və fərdi evlər, ticarət anbarı, avtodayanacaqlar” zərər çəkib.

Zelenski ölən və yaralananların olduğunu əlavə edib, onların ailələrinə başsağlığı verib.

Öz növbəsində, Ukrayna Silahlı Qüvvələrinin Hərbi Hava Qüvvələrinin spikeri Yuri İqnat milli telemarafonun efirində təsdiqləyib ki, Rusiya dekabrın 29-na keçən gecə “Kalibr” raketləri istisna olmaqla, özündə olan bütün növ raketlərlə Ukraynaya hücum edib. "Biz heç vaxt monitorumuzda eyni anda bu qədər çox hədəf görməmişdik" deyə o bildirib.