Türkiyə İsveç və Finlandiyanın NATO-ya üzvlüyünü dəstəkləməyə razılaşıb

Bakı/28.06.22/Turan: Finlandiya prezidenti Sauli Niinistönin ofisi bildirib ki, Madriddə keçirilən NATO sammitində Türkiyə İsveç və Finlandiyanın alyansa daxil olmasına dəstək verməyə razılaşıb. Madriddə keçirilən danışıqlardan sonra Finlandiya, İsveç və Türkiyə birgə memorandum imzalayıb.

“Bu görüşün nəticəsində xarici işlər nazirlərimiz bu həftə Madriddə keçiriləcək sammitdə Türkiyənin Finlandiya və İsveçin NATO-ya üzv olmaq dəvətini dəstəkləyəcəyini təsdiqləyən üçtərəfli memorandum imzaladılar. NATO-ya daxil olmağımız üçün konkret addımlar yaxın iki gün ərzində NATO müttəfiqləri tərəfindən razılaşdırılacaq”, cənab Niinistonun ofisinin bəyanatında deyilir.

Qeyd olunur ki, son həftələr Türkiyə terror təhlükəsi ilə bağlı narahatlığını ifadə edib. “Finlandiya bu narahatlıqları həmişə ciddi qəbul edib. Finlandiya terrorizmi bütün forma və təzahürlərində pisləyir. NATO üzvü kimi Finlandiya NATO sənədlərinə və terrorizmlə mübarizə siyasətinə tam əməl edəcək”, - Helsinki bildirir.

Finlandiya Prezidentinin Ofisi qeyd edib ki, terrorizmlə mübarizə, silah ixracı və emissiyası sahəsində əməkdaşlıq genişləndikcə Finlandiya öz milli qanunvericiliyinə uyğun fəaliyyət göstərməyə davam edəcək.

“Finlandiyanın NATO-ya üzvlük yolunda bu mərhələni tamamladığım üçün xoşbəxtəm. İndi mən Madriddə gələcək müttəfiqlərimizlə Finlandiyanın NATO-dakı rolu ilə bağlı səmərəli danışıqları səbirsizliklə gözləyirəm”, - Sauli Niinistö bildirib.

Finlandiya və İsveç mayın 18-də NATO-ya üzv olmaq üçün müraciət ediblər. Lakin Türkiyə veto hüququndan istifadə edərək bu prosesi əngəllədi. Türkiyə hakimiyyəti İsveç və Finlandiyanın NATO-ya qəbulu ilə bağlı on şərti yerinə yetirsələr, razılaşmağa hazır olduqlarını bildiriblər. Onların əksəriyyəti Türkiyədə terrorçu sayılan Kürdüstan Fəhlə Partiyasının fəaliyyətinin yatırılması ilə bağlıdır.-0-