Ukrayna və müttəfiqləri təyyarənin vurulması ilə bağlı İrana qarşı iş qaldırıb

Ukrayna, İsveç, Kanada və Böyük Britaniya yanvarın 8-də birgə bəyanat yayaraq, 2020-ci ildə Ukrayna Beynəlxalq Hava Yollarının 752 saylı reysini İranın vurması ilə bağlı Beynəlxalq Mülki Aviasiya Təşkilatı (ICAO) ilə mübahisələrin həlli prosesinə başlandığını elan ediblər.

752 saylı reys Tehrandan Kiyevə uçan mülki sərnişin reysi olub və havaya qalxdıqdan az sonra iki raketlə vurulub və təyyarədə olan 176 nəfərin hamısı həlak olub.

Həlak olanlar arasında İran, Kanada, Ukrayna, İsveç, Əfqanıstan və Böyük Britaniya vətəndaşları var.

İran rəsmiləri əvvəlcə insidentlə bağlı hər hansı əlaqəni təkzib etsə də, sonradan İran İnqilab Keşikçiləri Korpusunun hava hücumundan müdafiə bölməsinin “Boeing” təyyarəsini ABŞ-ın qanadlı raketi ilə səhv saldığını bildirib.

Təyyarənin vurulması ABŞ-ın İraqda iranlı general-mayor Qasım Süleymanini öldürməsindən bir neçə gün sonra baş verib və İran və ABŞ arasında gərginliyi artırıb.

İranın təyyarə qəzasına görə məsuliyyəti boynuna almasından sonra İran prezidenti Həsən Ruhani bunun "insan səhvi" və "bağışlanmayan səhv" olduğunu deyib.

Ukrayna, İsveç, Kanada və Böyük Britaniya ilə birlikdə 2023-cü ilin iyulunda Beynəlxalq Ədalət Məhkəməsində (ICJ) iddia qaldırıb.

İran "qanunsuz və qəsdən cinayət törədilməsinin (təyyarə qəzası) qarşısını almaq üçün bütün praktiki tədbirləri görmədi" və "beynəlxalq hüquqa uyğun olaraq qərəzsiz, şəffaf və ədalətli cinayət təhqiqatı və təqibi aparmadı", - press-relizdə deyilir.

Yanvarın 8-də verilən birgə bəyanatda bu fikir təkrarlanır: “İran artıq dörd ildir ki, bu məsələ ilə bağlı danışıqlara başlamaq üçün çoxsaylı cəhdlərimizə baxmayaraq, PS752 reysinin vurulmasına görə tam hüquqi məsuliyyəti qəbul etməkdən imtina edir”.