Ukraynalılar Rusiyanın Qara dəniz donanmasının flaqmanını batırıblar /yenilənib/

Bakı/14.04.22/Turan: Ukrayna hərbçiləri gecə iki “Neptun” raket zərbəsi nəticəsində Rusiyanın Qara dəniz donanmasındakı ən güclü gəmisi “Moskva”nı partladıblar. Raketin düşməsi nəticəsində gəmidə döyüş başlığının detonasiyası baş verib.

Güclü dağılmadan sonra gəmi yan tərəfə əyilib və İlan adasının yaxınlığında batıb, Rusiya və Ukrayna mənbələri bildiriblər.

Qeyri-rəsmi məlumatlara görə, gəminin bortunda 510 ekipaj üzvü olub. Rusiya mediası bildirir ki, onların hamısı xilas edilib. Lakin qeyri-rəsmi məlumatlara görə, cəmi 50 nəfər xilas edilib.

Rusiya tərəfi gəminin Ukrayna raketləri tərəfindən məğlub edildiyini etiraf etmir və “yanğın baş verib” deyir.

“Neptun” Ukrayna tərəfindən hazırlanmış gəmi əleyhinə raketdir.

Onun kütləsi 780 kiloqram, uzunluğu 5,5 metr, döyüş başlığı 150 ​​kiloqramdır. O, 280 km-ə qədər məsafəni vurmaq üçün nəzərdə tutulub.

Beləliklə, Rusiya ordusu ən ciddi və psixoloji cəhətdən ən ağır zərbəni alıb. Bu, həm də şəxsi heyətin ən böyük itkisidir.-02B-

*   *   *

Rusiya Qara dəniz donanmasının flaqmanı sıradan çıxarıldı

Reuters:  Cümə axşamı Rusiya bildirib ki, onun Qara dəniz donanmasındakı flaqmanına ciddi ziyan dəyib və partlayışdan sonra ekipaj evakuasiya edilib. Ukraynalı məmurun  sözlərinə görə, partlayış raket zərbəsi nəticəsində baş verib.

“İnterfaks” agentliyi məlumat verib ki, Rusiya Müdafiə Nazirliyi “Moskva” raket kreyserində yanğın nəticəsində hərbi sursatların partladığını bildirib.

Yanğının səbəbi açıqlanmayıb, lakin Qara dəniz Odessa limanı ətrafındakı bölgənin ukraynalı qubernatoru Maksim Marçenko bildirib ki, “Moskva”nın Ukrayna istehsalı olan iki “Neptun” gəmi əleyhinə qanadlı raketlə vurulub.

“Qara dənizi qoruyan “Neptun” raketləri çox ciddi ziyan vurublar", - o deyib. 

Ukrayna Müdafiə Nazirliyi şərhlərlə bağlı sorğuya cavab verməyib,  Reuters isə tərəfləriin heç birinin iddialarını yoxlaya bilməyib.

“Moskva” müharibə başlayandan bəri ciddi ziyan dəyən ikinci böyük gəmidir. Ötən ay Ukrayna Azov dənizində “Orsk” yardımçı desant gəmisini məhv etdiyini bildirmişdi.

Rusiya donanması Ukraynaya qanadlı raketlər atıb və onun Qara dənizdəki əməliyyatları Ukraynanın cənubunda və şərqində yerüstü əməliyyatları dəstəkləmək üçün həlledici əhəmiyyətə malikdir.

Rusiya informasiya agentlikləri bildiriblər ki, 1983-cü ildə istismara verilmiş “Moskva” 16 ədəd ən azı 700 kilometr (440 mil) məsafəli “Vulkan” gəmi əleyhinə qanadlı raketlə silahlanıb.-0-