Yapon dənizi sahillərində bir sıra güclü zəlzələlərdən sonra Yaponiyada sunami xəbərdarlığı edilib

AP:  Bazar ertəsi Yaponiyada sunami xəbərdarlığı və qərb sahillərində bir sıra güclü zəlzələlərdən sonra sakinlərə sahilyanı əraziləri tərk etmək barədə ciddi tövsiyə edilib.

Yaponiya Meteorologiya Agentliyi saat 16:00-dan qısa müddət sonra İşikava sahillərində və yaxınlıqdakı prefekturalarda bir sıra zəlzələlər baş verdiyini, birinin ilkin maqnitudasının 7,6 olduğunu bildirib.

Agentlik İşikava üçün güclü sunami xəbərdarlığı, eləcə də Yaponiyanın əsas Honsyu adasının qərb sahilinin qalan hissəsi üçün aşağı səviyyəli sunami xəbərdarlığı edib.

Yaponiyanın NHK TV ictimai telekanalı xəbərdarlıq edib ki, su axını 5 metr (16,5 fut) hündürlüyə çata bilər və insanları sürətlə hündür yerlərə və ya yaxınlıqdakı binaların damlarına çıxmağa çağırıb.

Hökumət sözçüsü Yoşimasa Hayaşi jurnalistlərə bildirib ki, ərazidəki nüvə stansiyalarında heç bir insident qeydə alınmayıb. Lakin o, sahilyanı ərazilərin sakinlərinə gözlənilən sunami barədə xəbərdarlıq edib.

“Hər dəqiqənin əhəmiyyəti var. Xahiş edirəm, təcili olaraq təhlükəsiz əraziyə təxliyə olunun”.

Təxminən 3 metr (təxminən 10 fut) hündürlüyündə sunaminin Yaponiyanın qərb sahillərindəki Niiqatanı və digər prefekturaları vuracağı gözlənilirdi. NHK telekanalının məlumatına görə, daha kiçik sunami dalğalarının sahil xəttinə çatdığı artıq təsdiqlənib.

Zəlzələlərin özü də dağıntılara səbəb olub. Yapon xəbərlərinin kadrlarında İşikava prefekturasındakı Vacima şəhərinin bir bölgəsindən qırmızımtıl tüstü qalxdığını görünür və orada yanğın ola biləcəyini qeyd edilib.

Başqa bir rayonda ev uçub, zərərçəkənlərin axtarışı davam edir.

Ərazidə sürətli qatarların hərəkəti dayandırılıb. NHK bildirib ki, magistralın bəzi hissələri də bağlanıb və su xətləri zədələnib.

Meteorologiya agentliyi bütün ölkəyə yayımlanan mətbuat konfransında bildirib ki, rayon gələn həftə, xüsusən də yaxın iki-üç gün ərzində daha da güclü zəlzələlərə məruz qala bilər.

Sunami barədə xəbərdarlıq Yaponiyanın ən şimalında əsas ada olan Hokkaydo, həmçinin Şimali Koreya və Rusiyanın bəzi hissələri üçün də edilib. Rusiya rəsmiləri Saxalin adasında sunami təhlükəsi elan edərək, dalğaların adanın qərb sahillərindəki ərazilərə təsir edə biləcəyi barədə xəbərdarlıq ediblər.

Qonşu Cənubi Koreyada meteorologiya agentliyi bəzi şərq sahil şəhərlərinin sakinlərini dəniz səviyyəsində mümkün dəyişiklikləri izləməyə çağırıb. Sonradan vuran sunami dalğaları ilkin dalğalardan daha böyük ola bilər.

Yaponiya hökuməti zəlzələlər və sunamilər haqqında məlumat toplamaq və təhlükəsizliyi təmin etmək və ictimaiyyəti operativ şəkildə məlumatlandırmaq məqsədilə xüsusi təcili yardım mərkəzi yaradıb, deyə Baş nazir Fumio Kişida jurnalistlərə bildirib.

Yaponiya seysmik cəhətdən çox təhlükəli ölkədir. 2011-ci ilin martında güclü zəlzələ və sunami atom elektrik stansiyasında qəzaya səbəb olmuşdu.