Bakı Tehranın təxribatı ilə barışmayacağını bildirir

Azərbaycan Prezidenti İlham Əliyev çərşənbə günü İranı Naxçıvan Muxtar Respublikasına pilotsuz uçuş aparatları ilə hücum təşkil etməkdə ittiham edib və ölkənin Silahlı Qüvvələrinin tam döyüş hazırlığı vəziyyətinə gətirildiyini bildirib. Bu addım iki qonşu dövlət arasında gərginliyin daha da artmasına səbəb ola bilər.

Milli Təhlükəsizlik Şurasının iclasında çıxış edən İlham Əliyev hadisəni “İran tərəfindən törədilmiş terror aktı” kimi qiymətləndirib və Tehran rəhbərliyindən izahat, üzr istəmək və günahkarların cinayət məsuliyyətinə cəlb olunmasını tələb edib.

“Azərbaycan bu iyrənc terror aktını qətiyyətlə pisləyir və bu cinayəti törədənlər dərhal məsuliyyətə cəlb olunmalıdır,” — deyə prezident bildirib.

İlham Əliyevin sözlərinə görə, Azərbaycan Silahlı Qüvvələri və digər güc strukturları tam hazırlıq vəziyyətinə gətirilib və zərurət yarandığı halda istənilən əməliyyatı həyata keçirməyə hazırdır.

Prezidentin bəyanatları Bakı ilə Tehran arasında son illərdə bir neçə dəfə gərginləşmiş münasibətlərin fonunda səslənib.

İlham Əliyev qeyd edib ki, bu iki ölkə arasında baş verən ilk ciddi insident deyil. O, 2023-cü ilin yanvarında Azərbaycanın Tehrandakı səfirliyinə silahlı hücumu xatırladıb. Həmin hadisə zamanı diplomatik nümayəndəliyin bir əməkdaşı həlak olmuş, daha bir vətəndaş isə ağır yaralanmışdı.

Prezident bildirib ki, Azərbaycan dəfələrlə İrana öz ərazisinin qonşu dövlətlərə qarşı istifadə olunmayacağını bəyan edib. Onun sözlərinə görə, xüsusilə keçən il baş vermiş toqquşmalardan sonra bu mövqe açıq şəkildə ifadə olunub. Buna baxmayaraq, İranın rəsmi şəxsləri və dövlət mediası Azərbaycan əleyhinə ittihamlar səsləndirməyə davam edib.

“İranın dövlət qurumlarının nəzarətində olan media resursları Azərbaycanı ləkələmək, İranda yaşayan soydaşlarımızın fikrini dəyişdirmək üçün Azərbaycana qarşı çirkin, şər-böhtan kampaniyası aparırdı. Çünki yaxşı bilirlər ki, bu gün müstəqil Azərbaycan dövləti İranda yaşayan bir çox azərbaycanlılar üçün də ümid yeridir”, — deyə İlham Əliyev bildirib.

Prezident vurğulayıb ki, Azərbaycan nə o vaxt, nə də bu dəfə İrana qarşı olan əməliyyatlarda iştirak etmir və etməyəcək. Bununla yanaşı, o qeyd edib ki, ölkə öz suverenliyini və ərazi bütövlüyünü qorumağa hazırdır.

“Biz öz ərazi bütövlüyümüzü qoruyuruq və qorumuşuq. Necə ki, Ermənistan işğalına son qoymuşuq, istənilən şər qüvvəyə qarşı öz gücümüzü göstərməyə hazırıq və İranda bunu unutmasınlar,” — deyə o bildirib.

İlham Əliyev həmçinin qeyd edib ki, Azərbaycan yaxın vaxtlarda İranda baş vermiş faciəvi hadisələrlə bağlı bu ölkəyə başsağlığı verib. Onun sözlərinə görə, Azərbaycan xarici işlər naziri onun tapşırığı ilə bu məsələni iranlı həmkarı ilə müzakirə edib, prezident isə şəxsən Bakıda İran səfirliyini ziyarət edərək başsağlığı kitabına qeyd yazıb.

“Mən onların səfirliyinə gedib başsağlığı vermək üçün öz mövqeyimi bildirdim. Halbuki məndən başqa heç bir dövlət başçısı İranın heç bir səfirliyinə getməyib. Yəni bunu qiymətləndirməmək, bunu yerə vurmaq, özlərini alçaq, nankorlar kimi aparmaq heç kimə şərəf gətirmir.” — deyə o bildirib və əlavə edib ki, Azərbaycan artıq diplomatik addımlar atmağa başlayıb. İranın Azərbaycandakı səfiri Xarici İşlər Nazirliyinə çağırılıb və ona etiraz notası təqdim olunacaq.

Prezident həmçinin bildirib ki, həmin gün İranın xarici işlər nazirinin müavini Bakıya zəng edərək Livandakı İran səfirliyinin əməkdaşlarının təxliyəsi üçün kömək istəyib, çünki İranın bunu etmək imkanı yoxdur.

“Mən dərhal göstəriş verdim ki, kömək göstərilsin və təyyarə göndərilsin,” — deyə İlham Əliyev bildirib. “Onlar hətta bunun pulunu ödəməyi təklif etdilər, amma mən dedim ki, buna ehtiyac yoxdur — əgər biz çətin anda kömək etməsək, bəs nə vaxt edəcəyik?”

“Bütün bunlardan sonra isə Naxçıvana xain zərbə endirildi,” — deyə o əlavə edib.

Bu arada İran Silahlı Qüvvələrinin Baş Qərargahı ittihamları rədd edib və bildirib ki, Naxçıvana pilotsuz uçuş aparatları ilə hücum İranla Azərbaycanı qarşı-qarşıya qoymaq məqsədi ilə İsrail tərəfindən təşkil olunmuş təxribatdır.

Qarşılıqlı ittihamlar hadisə ətrafında qeyri-müəyyənliyi daha da artırıb və sürətli diplomatik həll ehtimalını sual altına qoyub.

Bakı izahat tələb etdiyi, Tehran isə məsuliyyəti rədd etdiyi bir vaxtda analitiklər xəbərdarlıq edirlər ki, vəziyyət iki ölkə arasındakı uzun və həssas sərhəd boyunca yeni hərbi insidentlərə və daha geniş eskalasiyaya gətirib çıxara bilər.