Məhkəmə icmalı: 25–26 may 2026-cı il

Siyasətçilər, vətəndaş cəmiyyəti nümayəndələri və jurnalistlərin məhkəmə prosesləri

1) Mayın 25-də Bakı Ağır Cinayətlər Məhkəməsində hakim Namiq Kərimovun sədrliyi ilə Alman Marşal Fondunun (GMF) Azərbaycan üzrə məsləhətçisi Mehriban Rəhimlinin işi üzrə məhkəmənin növbəti iclası keçirilib.

İclasda QHT sədri Hafiz Həsənov şahid qismində ifadə verib. H. Həsənov ibtidai istintaqda verdiyi ifadədən imtina edərək əlavə edib ki, M. Rəhimli ilə apardığı işgüzar münasibətlərdə qeyri-qanuni hallar olmayıb. Ardınca H. Həsənov özü barədə də cinayət işi üzrə məhkəmə istintaqının getdiyini bildirərək hakim və dövlət ittihamçısının suallarına cavab verməkdən imtina edib.

Sonra şahid A. Pəncəliyeva ifadə verib.

M. Rəhimli həmçinin iclasda çıxış edərək əlavə edib ki, onun rəsmi iki bank hesabı olub: onlardan birində GMF-dən aldığı əmək haqqını qəbul edib, digərindən isə ailə büdcəsi üçün istifadə edib. Bundan başqa, heç bir ölkədə və Azərbaycanda başqa bank hesabı olmayıb.

Proses iyunun 8-də davam edəcək.

2) Mayın 25-də Bakı Ağır Cinayətlər Məhkəməsində hakim Aygün Qurbanovanın sədrliyi ilə hüquq müdafiəçisi Anar Məmmədli və insan haqları fəalı Anar Abdullanın işi üzrə məhkəmənin növbəti prosesi keçirilib.

Əvvəlcə A. Abdullanın vəkili Günay İsmayılova vəsatətlə çıxış edərək bildirib ki, A. Abdullanın anası şizofreniya xəstəliyindən əziyyət çəkir, mayın 6-dan Respublika Psixiatriya Xəstəxanasına yerləşdirilib və bu barədə sənədlərin məhkəməyə göndərilməsi ilə bağlı xəstəxanaya sorğu göndərilməsini xahiş edib. Dövlət ittihamçısı qarşı olsa da, yekunda vəsatət təmin edilib.

Ardınca A. Abdullanın ev dustaqlığına buraxılması ilə bağlı vəsatət verilsə də, bu rədd edilib.

Daha sonra A. Məmmədlinin vəkili Elçin Sadıqov vəsatətlərlə çıxış edərək A. Məmmədlinin avtomobili üzərindən həbsin götürülməsi, A. Məmmədlinin qrant aldığı donor təşkilatlarına sorğuların göndərilməsi, A. Məmmədlinin 2014–2024-cü illərdə gömrük bəyannamələrinin məhkəməyə göndərilməsi, cinayət işi materiallarından bir sıra vəsatətlərin çıxarılması ilə bağlı müraciətlər edib. Məhkəmə gömrük bəyannaməsi ilə bağlı vəsatəti təmin etməyib, digərlərini isə sənədlərin tədqiqindən sonraya saxlayıb.

Məhkəmə iclası iyunun 8-də sənədlərin tədqiqi ilə davam edəcək.

3) Mayın 25-də Bakı Ağır Cinayətlər Məhkəməsində “Toplum TV işi” üzrə növbəti məhkəmə iclası keçirilib.

İclasda hakim Azər Tağıyev iş üzrə məhkəmə istintaqının başa çatdığını elan edib və dövlət ittihamçısına söz vermək istəyib. Demokratik Təşəbbüslər İnstitutunun (IDI) rəhbəri və III Respublika Platformasının spikeri Akif Qurbanov isə buna etiraz edib. O bildirib ki, bir neçə mühüm vəsatəti var.

A. Qurbanov məhkəmə protokollarında onun çıxışlarının təhrif olunduğunu və ya verilmədiyini bildirib və protokollara düzəliş edilməsi ilə bağlı vəsatət verib. O, həmçinin təqsirləndirilən şəxslərin evlərində və ofisdə axtarış zamanı götürülən texniki vasitələrinin cinayət işində düzgün qeyd edilmədiyini bildirərək onların sübutlar siyahısından çıxarılmasını istəyib.

Başqa bir vəsatətlə isə A. Qurbanov bir sıra vəzifəli şəxslərin məhkəməyə gətirilib dindirilməsini istəyib.

Məhkəmə vəsatətləri təmin etməyib.

Növbəti məhkəmə iclası 8 iyuna təyin edilib.

4) Mayın 25-də Bakı Apellyasiya Məhkəməsində “QHT işi” çərçivəsində həbs olunmuş sosial işçi Zamin Zəkinin apellyasiya şikayəti üzrə məhkəmə iclası keçirilib.

Hazırlıq iclasında Z. Zəkinin anket məlumatları dəqiqləşdirilib. Ardınca iş məhkəmə baxışına verilib.

5) Mayın 26-da Yasamal Rayon Məhkəməsində hakim Rauf Daşdəmirovun sədrliyi ilə Samirə Qasımlının işi üzrə məhkəmə prosesi keçirilib.

Azər Qasımlının işində zərərçəkmiş kimi tanınan Qurabəli Yusibovun xüsusi ittiham qaydasında Binəqədi Rayon Məhkəməsinə verdiyi şikayət ötən ay çıxarılan qərarla Yasamal Rayon Məhkəməsinə göndərilmişdi.

Hakim R. Daşdəmirovun sədrliyi ilə keçirilən hazırlıq iclasında əvvəlcə S. Qasımlının anket məlumatları dəqiqləşdirilib.

Daha sonra hakim bildirib ki, xüsusi ittiham qaydasında şikayətlərə dair işlərə baxılması üzrə məhkəmə təcrübəsi haqqında Ali Məhkəmə Plenumunun qərarına əsasən işə hadisənin baş verdiyi yer üzrə baxılmalıdır. Həmin “Facebook” paylaşımlarının hər nə qədər S. Qasımlı Yasamalda yaşadığı mənzildən yazıldığını özü bildirsə də, bunun konkret sübutu yoxdur və bu, mübahisəli haldır.

Hakimin qərarına əsasən, mübahisəli epizoda baxılması və məhkəmənin təyin edilməsi barədə qərarın verilməsi üçün iş Bakı Apellyasiya Məhkəməsinə göndərilib.

6) Mayın 26-da Bakı Ağır Cinayətlər Məhkəməsində inanclı fəal Elşən Quliyevə hökm oxunub.

E. Quliyev 4 il azadlıqdan məhrum edilib.

E. Quliyev barəsindəki Cinayət Məcəlləsinin 234.4.3-cü maddəsi (qabaqcadan əlbir olan bir qrup şəxs tərəfindən satış məqsədilə qanunsuz olaraq külli miqdarda narkotik vasitə və psixotrop maddələri əldə etmə, saxlama, daşıma və satma) 234.1-1-ci maddəyə tövsif olunub, bununla da ittihamdan “satış məqsədi” çıxarılıb.

E. Quliyev son sözündə özünü təqsirli bilməyib, ittihamın saxta olduğunu bildirib.

Elşən Quliyev ötən ilin avqustunda çalışdığı “Sədərək” ticarət mərkəzində polis tərəfindən saxlanılıb.

Korrupsiya və dövlət orqanları ilə bağlı məhkəmə prosesləri

1) Mayın 25-də Bakı Ağır Cinayətlər Məhkəməsinin hakimi Fəxri Məmmədovun sədrliyi ilə Bakıda fəaliyyət göstərən “UĞUR 777 estetik mərkəz”də yol verilən qanunsuzluqlara görə təqsirləndirilən şəxslər – Murad Bağırov, Rəsmiyyə Quliyeva və Xəyalə İsmayılovanın cinayət işi üzrə baxış iclası keçirilib.

İclasda dövlət ittihamçısı ittiham aktını elan edib.

Təqsirləndirilən şəxslər onlara qarşı elan edilmiş ittiham üzrə özlərini təqsirli bilməyiblər.

Məhkəmənin növbəti iclası iyunun 9-na təyin edilib.

İttihama görə, “UĞUR 777 estetik mərkəz”də özlərini həkim-kosmetoloq kimi təqdim edən Xəyalə İsmayılova, Murad Bağırov, Firuzə Əliyeva, Gülbədə Abdullayeva, Zairə Salmanova və digərləri tərəfindən ayrı-ayrı şəxslərin bədən nahiyələrində icra olunan estetik cərrahi əməliyyatlar nəticəsində onların sağlamlığına ağır xəsarət yetirilməsinə əsaslı şübhələr müəyyən edilib.

Xəyalə İsmayılova, Murad Bağırov, Rəsmiyyə Quliyeva və Xəyalə İsmayılovaya Cinayət Məcəlləsinin 131.2 (ehtiyatsızlıqdan sağlamlığa ağır zərər vurma), 309.2 (ağır nəticələrə səbəb olan vəzifə səlahiyyətlərini aşma), 314.2-ci (ağır nəticələrə səbəb olan səhlənkarlıq) və digər maddələri ilə ittiham irəli sürülüb.

2) Mayın 25-də Gəncə Ağır Cinayətlər Məhkəməsində ali məktəblərə qəbul və buraxılış imtahanlarında istifadə üçün texniki vasitələr hazırlayan və satan təqsirləndirilən şəxslərin cinayət işi üzrə məhkəmə istintaqı tamamlanıb.

Hökmə əsasən, təqsirləndirilən İslam Babayev 1 il 6 ay müddətinə azadlıqdan məhrum edilib.

Ayxan Məmmədov və Murad Məmmədova isə azadlığın məhdudlaşdırılması cəzası tətbiq olunub.

İslam Babayev, Ayxan Məmmədov və Murad Məmmədova qarşı Cinayət Məcəlləsinin 302.3 (gizli qaydada informasiya alınması üçün nəzərdə tutulmuş texniki vasitələri qanunsuz olaraq satma və satış məqsədilə əldə etmə) və 308.1-ci (vəzifə səlahiyyətlərindən sui-istifadə etmə) maddələri ilə ittiham irəli sürülmüşdü.

3) Mayın 25-də Gəncə Şəhər Məhkəməsində hakim Elçin Məmmədovun sədrliyi ilə buraxılış və qəbul imtahanlarına qanunsuz texniki vasitələrin keçirilməsi ilə bağlı cinayət işi üzrə məhkəmə prosesi davam etdirilib.

İclasda təqsirləndirilən Kamran Əsədov və Gündüz Abbasov ifadə veriblər.

Dövlət ittihamçısı, hakim və DİM nümayəndələri onların ifadələri arasında ziddiyyətlər olduğunu bildiriblər.

DİM nümayəndələri iclasda əlavə şahidlərin dindirilməsi ilə bağlı vəsatət veriblər.

Proses iyunun 11-də davam etdiriləcək.

Gündüz Abbasova Azərbaycan Respublikası Cinayət Məcəlləsinin 302.3 (gizli qaydada informasiya alınması üçün nəzərdə tutulmuş texniki vasitələri qanunsuz olaraq satma və satış məqsədilə əldə etmə) və 308.1-ci (vəzifə səlahiyyətlərindən sui-istifadə etmə), Kamran Əsədova həmin Məcəllənin 302.3 və 32.5, 308.1-ci (vəzifə səlahiyyətlərindən sui-istifadə etmədə köməkçilik), Sənan Hüseynova isə həmin Məcəllənin 302.3-cü maddələri ilə ittiham elan edilib.

4) Mayın 25-də Bakı Ağır Cinayətlər Məhkəməsində hakim Elnur Nuriyevin sədrliyi ilə Azərbaycan Auditorlar Palatasının Maliyyə və texniki təminat idarəsinin sabiq rəisi Vəli Rəhimov, maliyyəçi-mühasib Gövhər Əhmədova və auditor Fəridə Novruzovanın cinayət işi üzrə məhkəmə prosesində dövlət ittihamçısı çıxış edib.

Dövlət ittihamçısı çıxışında təqsirləndirilənlər Gövhər Əhmədova, Fəridə Novruzova və Vəli Rəhimovun hər birinin 10 il müddətinə azadlıqdan məhrum edilməsini, V. Rəhimovun təqsirləndirildiyi Cinayət Məcəlləsinin 313-cü maddəsi üzrə cinayət məsuliyyətinə cəlbetmə müddəti bitdiyi üçün xitam verilməsini məhkəmədən xahiş edib.

Müdafiə vəkilləri çıxış üçün vaxt istəyiblər. Növbəti iclas iyunun 8-nə təyin olunub.

5) Mayın 25-də Bakı Ağır Cinayətlər Məhkəməsində hakim Azər Tağıyevin sədrliyi ilə rüşvət almaqda, dələduzluq və digər ağır cinayətlərdə ittiham olunan Eyvaz Niftalıyev və Ramis Hümmətovun cinayət işi üzrə hökm oxunub.

Məhkəmə Eyvaz Niftalıyevin 10 il, Ramis Hümmətovun isə 9 il müddətinə azadlıqdan məhrum edilməsini və R. Hümmətovun övladının yaşı 14-ə çatana qədər hökmün icrasının təxirə salındığını elan edib.

Ramis Hümmətov Müdafiə Sənayesi Nazirliyinin təbii ehtiyatlarla iş üzrə idarəsinin böyük elmi işçisi olub.

Eyvaz Niftalıyev isə Şamaxı rayonunda müəllim işləyib, əvvəllər dələduzluq cinayətinə görə məhkum olunub.

6) Mayın 26-da Xətai Rayon Məhkəməsində xeyli miqdarda dövlət vəsaitini mənimsəməkdə ittiham olunan Bakıdakı 202 saylı körpələr evi–uşaq bağçasının müdiri Simuzər Paşayeva və həmin uşaq bağçasının təsərrüfat işləri üzrə müdir müavini Qənirə Kazımovaya hökm oxunub.

Hökmə əsasən, Simuzər Paşayeva və Qənirə Kazımovaya bəraət verilib.

Qeyd olunan şəxslərə Cinayət Məcəlləsinin 179.2.3 və 179.2.4-cü (qulluq mövqeyindən istifadə etməklə və xeyli miqdarda ziyan vurmaqla mənimsəmə) maddələri ilə ittiham elan edilmişdi.

Separatçıların məhkəmə prosesləri

1) Mayın 26-da Bakı Apellyasiya Məhkəməsində hakim Elmar Rəhimovun sədrliyi ilə Ermənistan vətəndaşları (vaxtilə Qarabağdakı separatçı rejimdə yüksək vəzifə tutmuş şəxslər) – Araik Arutyunyan, Arkadi Qukasyan, Bako Saakyan, David İşxanyan, David Babayan, Levon Mnatsakanyan və digər şəxslərlə bağlı hökmdən verilmiş apellyasiya şikayəti üzrə hazırlıq iclası keçirilib.

İclasda barələrində cinayət işi üzrə apellyasiya icraatı aparılan şəxslərin hər biri bildikləri dillərdə – erməni və rus dillərində tərcüməçi, habelə müdafiələrinin təmin olunması məqsədilə vəkillərlə təmin edilib.

Dövlət ittihamını müdafiə edən prokuror Anar Ələkbərov bildirib ki, apellyasiya şikayətləri verilərkən cinayət-prosessual qanunvericiliyin tələblərinə əməl olunub. O qeyd edib ki, hazırkı mərhələdə məhkəmə baxışına hazırlıq iclasının predmetini işin apellyasiya baxışına təyin edilməsinin mümkünlüyü məsələsi təşkil edir. İttiham tərəfi hesab edir ki, apellyasiya icraatının başlanılması üçün qanunvericiliklə müəyyən edilmiş prosessual şərtlərə əməl olunub və iş əlavə sübutlar tələb edilmədən məhkəmə baxışına təyin edilə bilər.

Məhkəmə tərəflərin mövqelərini və verilmiş vəsatətləri müzakirə etdikdən, həmçinin tərəflərin verilən vəsatətlərə münasibətini öyrəndikdən sonra müşavirəyə gedib.

Müşavirədən sonra qəbul edilmiş qərarlar elan olunub və cinayət işi apellyasiya baxışına təyin edilib. Bildirilib ki, məhkəmə baxışı istintaq aparılmadan və əlavə sübutlar tədqiq edilmədən iyunun 2-də keçiriləcək.

Bakı Hərbi Məhkəməsinin 5 fevral 2026-cı il tarixli hökmünə əsasən, Arayik Harutyunyan, Levon Mnatsakanyan, David Manukyan, Davit İşxanyan və David Babayan ömürlük azadlıqdan məhrumetmə cəzasına məhkum ediliblər. Arkadi Qukasyan və Bako Sahakyan 20 il, Madat Babayan və Melikset Paşayan 19 il, Qarik Martirosyan 18 il, Davit Allahverdiyan və Levon Balayan 16 il, Vasili Beqlaryan, Qurgen Stepanyan və Erik Qazaryan isə 15 il müddətinə azadlıqdan məhrum ediliblər.