Dubayda Azərbaycan Dövlət Neft Şirkətinin dekarbonizasiya strategiyası müzakirə edilib

2050-ci ilə qədər xalis sıfır emissiya səviyyəsinə nail olmaq SOCAR-ın əsas məqsədlərindən biridir.  Bunu SOCAR prezidenti Rövşən Nəcəf dekabrın 3-də BMT - nin İqlim Dəyişikliyi Çərçivə Konvensiyasının Tərəflər Konfransının 28-ci sessiyası - COP28 çərçivəsində Dubay şəhərində təşkil olunan "SOCAR-ın dekarbonizasiya strategiyası və gələcək perspektivləri" tədbirində deyib.

Onun sözlərinə görə, 2050-ci ilə qədər "sıfır emissiya" (net Zero) hədəflərinə nail olmaq, həmçinin hasilat prosesində məşəl emissiyalarının azaldılması SOCAR-ın əsas məqsədlərindən biridir.

Rövşən Nəcəf bu addımların həm korporativ sosial məsuliyyətə, həm də SOCAR-ın ətraf mühitin mühafizəsi baxımından nümunəvi enerji şirkətinə çevrilməsi üçün atıldığını vurğulayıb.

Tədbir zamanı SOCAR-da ətraf mühitin mühafizəsi sahəsində görülən işlər, həyata keçirilən layihələr,  məqsədlər və onlara nail olmaq üçün atılacaq addımlar, neft-qaz əməliyyatlarında "yaşıl" enerjinin tətbiqi, dekarbonizasiya və enerji keçidi sahəsində strateji hədəflər barədə ətraflı təqdimat keçirilib.

Tədbirdə Ekologiya və təbii sərvətlər naziri Muxtar Babayev fəxri qonaq qismində çıxış edərək ətraf mühitin mühafizəsi və ekoloji tarazlığın bərpası ilə bağlı görülən işlər barədə ətraflı danışıb.