Türkanda zibilliklər

Türkanda bəzi küçələrdə  zibil qutuları yerləşdirilib. Zibil qutuları arasındakı məsafə isə çox böyükdür. Sakinlərin sözlərinə görə onlar zibilləri atmaq üçün uzun məsafə qət etməlidirlər. Zibil qutularının sayının az olmasından əlavə olaraq sakinlər qutuların müntəzəm olaraq təmizlənmədiyini qeyd edib.  

Türkandan 101 nömrəli avtobusla geri dönərkən yolda bir çox böyük zibilliklərin yarandığını müşahidə etdik. Sakinlər dəfələrlə aidiyyatı qurumlara müraciət etsələr də problemləri tamamilə həll olunmayıb. Zibilliklərin yaşayış yerlərinə çox yaxın olması da diqqətimizi çəkdi. Sakinlər dəfələrlə bu problemi işıqlandırdıqlarını amma onlara sadecə vədlərin verildiyini qeyd edib. Mediada yayımlanan bir neçə materialda da bu problem göstərilib. Zibil qutuları müntəzəm olaraq təmizlənmədiyi  üçün sakinlər zibillərini qutuların ətrafına atmaq məcburiyyətində qalıblar.

BakuTV-nin 2020-ci ildə hazırladığı  video materialda  Xəzər rayonunun Türkan qəsəbəsi üzrə icra nümayəndəliyindən problemlə bağlı verilən açıqlama qeyd olunub.

“Yaxın günlərdə zibil qutularının az olduğu ərazilərə yeni konteynerlər yerləşdiriləcək. Bu qablar məişət tullantıları üçündür. İnsanlar isə ora qum, daş, kəsək atır. Sakinlərdən xahiş edirik ki, zibillərini qablara atsınlar, yerə, küçəyə yox. Yeni qablarımız da gətirilib. Hamısı tezliklə qutuların az olduğu ərazilərə yerləşdiriləcək.”

Hazırda biz hələ də bu vədin tam yerinə yetirilmədiyinin şahidi olduq. Bəzi yerlərdə zibil qutuları olsa da onların sayı azdır. Sakinlər kəndlərin içərisində daha böyük zibilliklərin olduğunu qeyd ediblər. Sakinlər problemin həllini  zibil qutularının sayı artırılması  və onların müntəzəm olaraq təmizlənməsində görür.