2016-cı ilin dövlət büdcəsi balanslaşdırılmış olacaq

«Neft gəlirləri azalır, ona görə innovasiyalara üstünlük verilməlidir». Prezident İlham Əliyev iqtisadi məsələlərə və 2016-cı ilin dövlət büdcəsinin hazırlığı işlərinə həsr edilmiş müşavirədə belə deyib. Maliyyə-iqtisadi vəziyyət xoş olmasa da, o, nikbin ovqatda idi.

O, iqtisadi prosesləri neftin qiymətinin kəskin şəkildə aşağı düşməsi ilə bağlayıb. “Ancaq istisna edilmir ki, bu da siyasi sifarişin nəticəsidir”, deyə o bildirib. Manatın devalvasiyası, valyuta ehtiyatlarının iki dəfə azalmasına baxmayaraq, o hesab edir ki, şaxələndirmə, qeyri-neft sektorunun inkişafı ilə bağlı bu günə qədər atılan addımlar bu vəziyyətdən minimum itkilərlə çıxmağa kömək edəcək. «Ancaq biz çalışırıq və çalışacağıq ki, Azərbaycan xalqı bundan əziyyət çəkməsin», deyə prezident qeyd edib.

Ölkədə ümumi daxili məhsul, mütləq ifadədə sənaye istehsalı azalıb. Amma İlham Əliyev bildirir ki, iqtisadi inkişaf çox sürətlidir. «Azərbaycanda neft hasilatı artmır, düşür. Neftin qiyməti iki dəfədən çox düşüb. Ancaq biz yenə də inkişaf edirik. Qəbul etmək istəmirlər ki, bizim inkişafımızın təməlində düşünülmüş siyasət dayanır”, deyə o bildirib.

Gələn ilin büdcəsi ilə bağlı prezident deyib ki, büdcə “real vəziyyəti” nəzərə almalıdır. Gələn ilin büdcəsi balanslaşdırılmış, reallığı əks etdirən və lazımsız xərclərə yol verməyən bir büdcə olmalıdır. “Ən böyük prioritet təşkil edən investisiya layihələri də icra edilməlidir. Ancaq prioritet olmayan, o qədər də vacib xarakter daşımayan layihələri biz büdcə proqramına, investisiya proqramına salmamalıyıq. İsrafçılığa yol verilməməlidir”.

Prezident deyib ki, maliyyə nizam-intizamı daha da gücləndirilməli, vəsaitə qənaət edilməli, valyuta ehtiyatları, ARDNF vəsaitləri qorunmalıdır.

İlham Əliyev idarəetmə sahəsində islahatlardan da danışıb, növbəti dəfə “korrupsiyaya, rüşvətxorluğa qarşı daha da ciddi mübarizə aparılmalı” olduğunu vurğulayıb. 08D