ABB Asia House ilə saziş imzalayıb

Azərbaycan Beynəlxalq Bankı və Böyük Britaniyanın «Asia House» nüfuzlu işgüzar təşkilatı ABB-ya «Champion Supporter» statusunun verilməsinə dair saziş imzalayıb. Bu barədə bankın mətbuat xidməti məlumat verir. «Asia House» təşkilatı 1996-cı ildə yaradılıb və əsas məqsədi Avropa və Asiyanın işgüzar və ictimai dairələri arasında əlaqələrin qurulmasıdır.

«Asia House»un üzvləri sırasında BP, «Shell», «Barclays Capital», «Deutsche Bank», KPMG, HSBC, «Rolls-Royce», «British American Tobacco» və s.  məşhur Britaniya və beynəlxalq şirkətlər var. 

ABB uzun illərdir, «Asia House»la əməkdaşlıq edir. Asia House  ilə saziş münasibətlərin inkişafının məntiqi nəticəsidir. «Champion Supporter» statusunun alınması ilə ABB təşkilatın əsas tərəfdaşlarından biri olacaq.  Bank həmçinin qurumun strateji qərarların qəbul edilməsində iştirak etmək hüququ qazanır.

Ötən illər «Asia House»un hamiliyi və ABB-nin təşkilatçılığı ilə Britaniyanın bir neçə işgüzar nümayəndə heyəti Bakıda olub. ABB-nin rəhbəri Cahangir Hacıyev Beynəlxalq Palata Şurasına üzv qəbul edilib. 2012-ci ilin noyabrında ABB «Asia House»un dəstəyi və iştirakı ilə Londonda «Caspian Corridor Conference» adlı konfrans keçirib. Konfransın məqsədi Böyük Britaniyanın işgüzar dairələrini Azərbaycan iqtisadiyyatı və mədəniyyəti ilə tanış etmək olub. .—15D—