ABB-nin sabiq rəhbərinin bacısı Maliyyə Nazirliyini dələduzluqda ittiham edir

Azərbaycan Beynəlxalq Bankının (ABB) keçmiş rəhbəri, hazırda həbsdə olan Cahangir Hacıyevin bacısı Əminə Hacıyeva məhkəmə ərəfəsində maliyyə naziri Samir Şərifovu dələduzluqda və oğurluqda ittiham edib.

azadlıq.info saytında dərc edilən ölkə başçısına müraciətdə o bildirir ki, Maliyyə Nazirliyinin diktəsi ilə ABB-nin indiki rəhbərliyi ABB-nin sabiq rəhbərinin ailə üzvlərinin imzalarını saxtallaşdıraraq məhkəməyə təqdim edib.

Əminə Hacıyeva bildirir ki, imzaların yerli və beynəlxalq ekspertizasına nail olacaq.

O həmçinin qeyd edir ki, başqa səhmdarlar kimi ABB rəhbərinin ailə üzvlərinin səhmləri başqa əmanətçilərə borcun ödənilməsi üçün satılıb. Cahangirin həyat yoldaşı Zamirə Hacıyevanın 4 milyonluq kredit kartı üzrə borcu olub ki, o, səhmlərlə bu məbləği ödəyib. Lakin borc hələ də bağlanmayıb.

Hacıyeva Maliyyə Nazirliyini oğurluqda və bütün ittihamların C.Hacıyevə qarşı saxtalaşdırılmasında ittiham edir.

Hacıyeva prezidenti günahsız insanların azadlıqdan məhrum edilməsinə yol verməməyə çağırır.

C.Hacıyev və cinayət işindəki 7 nəfərə 179.3.1, 179.3.2 (mütəşəkkil dəstə tərkibində iri həcmdə mənimsəmə), 308.2i (ağır nəticələr verən vəzifə səlahiyyətlərindən sui-istifadə), 309.2 (ağır cinayətlə səbəb olan vəzifə səlahiyyətlərini aşma), 313 (vəzifə saxtakarlığı), 228.1 və  228.4 (qanunsuz odlu silah gəzdirmə, saxlama) maddələri ilə ittiham irəli sürülüb.—0-